Bijbelrooster voor 2 februari 2019
Ester 7 : 1 - 8 : 2: Rollen omdraaid
|
01Zo wazzen keunenk en Haman weer bie keunegin Ester om feestmoal mit heur te holden.
02Ook op dizze twijde dag, dou zai aan t wien drinken wazzen, zee keunenk tegen Ester: "Wat is joen verzuik, keunegin Ester? t Zel joe toustoan worden. Woar vroag ie om? Al is t ook haalfschaid van t keunenkriek - ie kriegen t."
03Dou zee keunegin Ester: "As ik joen genegenhaid wonnen heb, keunenk, en as keunenk dat behoagt, spoar mien levent en dat van mien volk den. Dat is wat ik joe vroagen wil, dat is mien wèns.
04Want wie binnen verkocht, ik en mien volk, om kepot, doodmoakt en oetreud te worden. As men ons bloots as sloaven en sloavinnen verkocht haar, den zol k mie stil holden. Dat haar ja nait slim genog west om keunenk mit lasteg te valen."
05"Wèl is t en woar is hai, dij hom t in kop hoald het om zoks te doun?" vruig Ahasveros aan keunegin Ester.
06Ester zee: "n Vijand, n minne, dij filaaine doar, Haman!"
Haman wer benaauwd dou hai zag hou keunenk en keunegin noar hom keken.
07Vergramd kwam keunenk in t èn, zien wien luit e stoan. Hai ging in toen van t pelaais, mor Haman bleef stoan om keunegin Ester om zien levent te smeken, want hai haar deur dat zien ondergang bie keunenk vaast ston.
08Dou keunenk oet toen van t pelaais weerom kwam in zoal doar men de wien dronk, was Haman deelvalen op rustbaank doar Ester op lag. "Keunegin ook nog geweld aandoun, bie mie in t pelaais?" raip keunenk. Hai haar t nog nait zegd of Haman vuil in swiem.
09Charbona, ain van keunenk zien hofdainders, zee: "Doar komt nog bie dat Haman n poal moakt het veur Mordechai, dij aigenste Mordechai dij keunenk zo'n grode dainst bewezen het. Hai staait bie t hoes van Haman, fiefteg èl hoog." Dou zee keunenk: "Spiets hom der op."
10 Men spietste Haman op poal dij hai veur Mordechai hènzet haar. Dou bedoarde keunenk zien grammiedeghaid.
01Aigenste dag gaf keunenk Ahasveros aan keunegin Ester t hoes van Haman, dij jeudenhoater. Mordechai kwam bie keunenk, want Ester haar verteld hou hai tou heur ston.
02Keunenk dee zegelring òf dij hai Haman ofpakken loaten haar en gaf hom aan Mordechai. En Ester stelde Mordechai aan over t hoes van Haman.
|
Ga naar het volledige bijbelrooster
(Op basis van rooster: www.bijbelgenootschap.nl)
Terug
