Jeremia 47
01Jeremia kreeg dit woord van de HEER aangoande Filistijnen, veurdat farao Gaza innomen haar.
02"Dit zegt de HEER:
Doar komt t wotter opzetten oet t noorden vandoan,
n revier dij overstroomt, dij t laand ter onder zet,
mit aal wat ter touholdt, steden en inwoners.
Mensken roupen t oet, bewoners begunnen te kloagen,
03bie t heuren van kletternde houven van hengsten,
van boldernde woagens en donzende roaden.
Voaders loaten heur kinder in steek,
ale moud is heur in schounen zakt.
04Want dag is ter heer,
dat ale Filistijnen verrinnewaaierd worden,
Tyrus en Sidon der aan goan, aan leste man tou.
De HEER verrinnewaaiert Filistijnen,
van Kreta zien noazoaten blift gainent over.
05Gaza scheert zok koal, Askelon zit in treur;
hou laank zel ie joezulm nog wat aandoun,
leste overschot van Filistijnen?
06Och, sweerd van de HEER,
komst nooit meer in rust?
Kroep weerom in dien schij,
schaai oet, bedoar die!
07Mor hou zol e in rust kommen kinnen
as de HEER hom der op oetstuurt
tegen Askelon en t haile kustkontraain?
|
