t Evengelie volgens Lucas 12
01In tied kwammen doezenden mensken bie nkander. Dij drongen zo, dat ze gounent onder vouten laipen. Dou zee e tegen zien leerlingen: "Woar joe veur Farizeeërs heur zoerdaig." Doar bedoulde hai heur hugelderij mit.
02"Der is niks ofdekt of t zel bloot kommen. En niks achterholden of t zel bekend worden.
03Aal wat of ie bie duustern beproat hebben, zel bie lichten heurd worden. Wat of ie ain achter deur in t oor flusterd hebben, zel van doaken òf oetbezuund worden.
04Tegen joe, mien vrunden, zeg ik: wees mor nait baang veur heur dij joe t levent benemen en joe den wieder niks doun kinnen.
05Ik zel joe aanwies geven veur wèl of ie baang wezen zollen: wees baang veur hom dij macht het joe noa dood in hel te smieten. Zekerwoar! Ik zeg joe: veur hom zol ie baang wezen.
06Dounen vief muskes gain twij sènt? En toch verget God gainain van heur.
07Hoaren op joen kop binnen alderdeegs aalmoal teld. Wees doarom nait baang. Ie binnen meer weerd as n haile swaarm musken.
08Ik zeg joe: elk dij bie mensken veur mie oetkomt, veur dij zel Menskenzeun ook oetkommen bie God zien engels!
09Mor wèl of mie bie mensken nait kennen wil, van dij zel ik mien handen oftrekken bie God zien engels.
10 En elk dij n onvertogen woord zeggen zel aan t adres van Menskenzeun, dat zel hom vergeven worden. Mor wèl of hillege Gaist lèlk moakt, dat zel hom nait vergeven worden.
11 As ze joe veurlaaiden veur Jeudse roaden, magistroaten en machthebbers, moak joe den mor gain zörgen hou of ie joe verweren mouten of wat of ie zeggen mouten.
12 Hillege Gaist zel joe op t aigenste ogenblik t goie woord ingeven."
13 Ain oet t volk zee tegen hom: "Meester, zeg es tegen mien bruier dat e aarvenis mit mie dailen mout."
14 Mor hai zee tegen hom: "Wèl het mie aansteld as rechter of notoares over joe?"
15 Hai zee tegen heur: "Kiek ter op tou dat ie joe woaren veur gieren en groapen. t Is ja zo: ook al het ain meer as genogt, zien bezittens binnen nait wis veur zien levent."
16 Doarom vertelde hai heur n geliekenis: "n Riek man zien gewazzen haren goud schud.
17 En hai ging bie zokzulm te roade en zee: 'Hou mout ik ter mit aan? Ik heb ja gain roemte genogt om mien vruchten op te baargen.'
18 Dou zee e: 'Waist wat? k Breek mien schuren òf en baauw grodern. En doar baarg k aal mien koorn en aal mien goud in op.
19 Den zeg k tegen miezulm: Jong, nou hest ter zo'n baarg goud liggen, kinst ter joaren mit tou. Goa mor rentnaaiern! Eet en drink en moak mor plezaaier!'
20 Mor God zee tegen hom: 'Onverstand dastoe bist! Dizze naacht zellen ze dien levent opaaisen. En wastoe veurnkander moakt hest, wèl krigt dat?'
21 Zo vergaait t ain dij veur zokzulm oppot en zien riekdom nait bruukt veur God."
22 Hai zee tegen zien leerlingen: "Doarom zeg ik joe: zit mor nait in zörg over joen moag wat of ie eten zellen. Of over joen veurkommen wat of ie aantrekken zellen.
23 Joen moag is van meer belang as joen eten en joen veurkommen as joen klaaier.
24 Denk es om kraaien! Ze zaaien nait en ze zichten nait. Ze hebben gain kelder of gain schuur. Toch vouert God heur. Ie binnen toch veul meer weerd as dij vogels?
25 Wèl van joe kin mit prakkezaaiern zokzulm n èl laanger moaken?
26 Nou, as ie t minste nait ainmoal doun kinnen, woarom zol ie den over dij aander dingen prakkezaaiern?
27 Kiek es noar lelies! Spinnen dounen ze nait en weven dounen ze ook nait. Ik zeg joe: Salomo in aal zien stoatsie was nait ains zo mooi aantrokken as ain van dijent.
28 As God nou t gras op t laand dat ter vandoag nog staait en mörgen in ovent opbraand wordt zo aankledt, den zel e joe dat toch veul meer doun? Ie mozzen hom wat beter vertraauwen!
29 Ie mouten ook nait aal vroagen: 'Wat zel wie eten?' of 'Wat zel wie drinken?' Moak joe doar mor nait drok om.
30 Dat binnen aal dingen doar mensken van wereld zok dik om moaken. Mor joen Voader wait dat ie doar verlet om hebben.
31 Nee, ie mouten joe drok moaken om zien riek. Den krieg ie dij dingen boetendes.
32 Wees mor nait baang, lutje koppeltje! Joen Voader het joe t riek ja toudocht.
33 Verkoop joen bezittens en dail t geld oet aan aarme lu. Moak joe n knip dij nait slit. Zörg veur n kaptoal in hemel dat nooit oprakt. Doar kin gain daif biekommen en gain mòt t opvreten.
34 Doar joen kaptoal is doar is joen haart ook ja.
35 Wees veerdeg aantrokken en loat joen lampen branden.
36 Wees as lu dij wachten op heur heer dij van bruloft weeromkommen mout. As dij den komt en aanklopt, kinnen ze hom ja vot deur openmoaken.
37 Dij knechten, dij wakker binnen as heer komt, dij binnen goud òf. Joa, ik verzeker joe: hai zel zok n schoet veurdoun, heur n stee aan toavel geven en heur op rieg òf bedainen.
38 En of e nou veur of noa twaalf uur komt, as e heur zo vindt den binnen ze goud òf.
39 Wait dit wel: as bewoner wos hou loat of daif kommen zol, haar e in zien hoes nait inbreken loaten.
40 Ie mouten ook kloarstoan. Op n tied dat ie t nait verwachten doun, komt Menskenzeun."
41 Petrus zee: "Heer, main ie mit dizze geliekenis bloots ons, of elkenain?"
42 De Heer zee: "Wèl is den dij traauwe en verstandege boas dij heer over zien volk aanstellen zel om heur op tied heur pozzie te doun?
43 Dij knecht, dij zien heer as e komt, doar mit dounde vinden zel, dij is goud òf.
44 Ik verzeker joe: hai zel hom over aal zien bezittens aanstellen.
45 Mor as dij knecht bie zokzulm zeggen zol: Mien heer komt nog lange nait weer, en hai zol hèngoan en sloagen t waarkvolk en hai zol eten en drinken en dronkend wezen,
46 den zel dij knecht zien heer kommen op n dag dat hai hom nait verwachten is en op n tied dij e nait wait. Den zel e hom tamtaaiern en hom behandeln as ain doar je nait van op aan kinnen.
47 n Knecht dij wait hou of zien heer t hebben wil en dij zien heer t nait noar t zin doan het, dij krigt n dik pak sloag.
48 Mor wèl of dat nait wait en dingen doan het doar e sloag veur verdaind het, dij krigt minder. Dij veul ontvongen het van dij wordt ook veul vroagd. En dij veul aanvertraauwd is van dij zel zoveul te meer vaargd worden.
49 Ik bin kommen om wereld in vuur te zetten. En wat wol ik geern dat t al aanstoken was.
50 Ik mout n deup ondergoan. En wat zai ik tegen t ogenblik aan dat dat wezen zel.
51 Haar ie docht dat ik kommen bin om vree te brengen? Gain sproake van, zeg ik joe. Eerder twijspaalk!
52 Van nou òf aan zellen vief in ain hoes tegen nkander wezen. Drij tegen twij. En twij tegen drij.
53 Voader tegen zeun, zeun tegen voader. Moeke tegen dochter, dochter tegen moeke. Schoonmoeke tegen schoondochter, schoondochter tegen schoonmoeke."
54 Hai zee ook tegen t volk: "As ie zain dat n wolk in t westen opzetten komt, zeg ie op slag: 'Der komt regen!' En t gebeurt ook.
55 En as wind oet t zuden komt, zeg ie: 't Wordt hait!' En t gebeurt ook.
56 Ie hugelders! t Weer wait ie oet te duden. Hou komt dat den dat ie dizze tied nait begriepen?
57 Woarom oordail ie zulm nait wat of recht is?
58 As ie mit joen tegenstander noar landvoogd goan, perbaaier den onderwegens van hom òf te kommen. Aans zel e joe veur rechter slepen. En rechter zel joe aan plietsie overgeven. En dij stopt joe in t gevang.
59 Ik verzeker joe: ie zellen doar vervaast nait oetkommen veurdat ie leste stuver betoald hebben."
|
