Spreuken 30
01Dit binnen woorden van Agur, zeun van Jake, oet Massa. Man zegt:
Ik heb wat muite doun mouten, o God.
Wat n muite heb ik doan! Ik kin nait meer!
02Ik bin ja dommer as wèl den ook,
ik heb haildaal gain verstand.
03Ook heb ik nait veul wieshaid opdoan,
ik heb al hail gain wait van de haailege God zien kennes.
04Wèl is omhoog klommen noar de hemel en weer deelkommen?
Wèl het de wind mit zien voesten vastpakt?
Wèl het aal t wotter in n klaid opvongen?
Wèl het de grènzen van de wereld vaststeld?
Hou is zien noam, hou is noam van zien zeun?
Dat wait ie toch?
05Elk woord van God is deurhèn zuverd,
veur aal dij bie hom schoel zuiken, is hai n schild.
06Dou niks aan zien woorden tou,
hai zol joe ja terechtwiezen en joe veur leugenpuut zetten.
07Twij dingen vroag ik van joe,
waaiger mie dij nait, veurdat ik oet tied kom:
08Bedrog en leugenproat, hol dij wied bie mie vandoan,
geef mie gain aarmoud en gain riekdom,
loat mie mit smoak t brood eten dat mie toudaild wordt.
09Dat ik nait as moag vol is, joe ofsweren zel: "Wèl is dij HEER?"
Dat ik nait as k aarm bin, oet stelen goan zel,
en noam van mien God op gribbegrap gooien.
10 Moak n knecht nait min bie zien heer,
hai kon joe ja wel vervluiken, en den mout ie der veur bouten.
11 Der is n generoatsie dij zien voader vervlökt
en dij gain goud woord veur zien moeke over het.
12 Der is n generoatsie dij van zokzulm maint dat e zuver is,
mor dij van aigen schiet nait schoonwosken is.
13 Der is n generoatsie mit ogen boven in kop van hoogmoud,
mit wenkbraauwen boven in t hoar.
14 Der is n generoatsie mit tanden as sweerden,
mit koaken as mèzzen,
om weerlozen tou wereld oet te vreten,
om aarmlastegen bie de mensken vot te bieten.
15 n Bloudzoeger het twij dochters: "Meer" en "Meer".
Der binnen drij dij nait te verzoadegen binnen,
alderdeegs vaaier zeggen nooit: "Zo is t genog."
16 Dat binnen t dodenriek, schoot van n onvruchtboare vraauw,
laand dat aaltied verlet om wotter het,
en t vuur dat nooit zegt: "Zo is t genog."
17 Wèl zien voader bespot en noar zien moeke nait lustern wil,
ogen zellen hom deur roaven oetpikt worden,
oarendsjongen zellen ze opvreten.
18 Drij dingen binnen mie te wonderboarliek,
alderdeegs vaaier begriep ik nait:
19 de vlucht van n oarend in de lucht,
de gaang van n slaang over n rots,
de voart van n schip in volle zee,
en de weg van n jongkerel noar n jonge maaid.
20 Dit is de weg van n vraauw dij mit ain aan t klongeln west het:
zai et, zai wiskt zok mond òf,
en zegt: "k Heb niks gain verkeerds doan."
21 Deur drij dingen is de haile wereld in bewegen,
deur vaaier alderdeegs, dij ze nait verdroagen kin:
22 deur n sloaf dij keunenk wordt,
deur n onneuzele dij zok te zat eten het,
23 deur n vraauw dij gainain hebben wol, mor dij evengoud aan de man komt,
en deur n maaid dij heur vraauw opzied zet.
24 Dizze vaaier daaiern binnen de lutjesten op de wereld,
toch binnen ze boetengewoon wies:
25 mieghommels - ze binnen mor n miesderg volkje,
toch zammeln ze bie zummerdag heur haile winterveurroad bie nkander;
26 klipdazzen - ze leven in lutje koppeltjes,
toch moaken ze heur holen in de rotsen;
27 sprinkhoanen - ze hebben gain keunenk,
toch holden heur plougen zok aan odder en regel;
28 evertaasken - kinnen ze mit haand pakken,
toch holden ze tou in pelaaizen van n keunenk.
29 Drij binnen der, alderdeegs vaaier, mit n stoatege gaang,
ze stappen rond in aal heur stoatsie:
30 n laiw - keunenk maank de daaiern,
dij veur gainain oet zied gaait,
31 n stoterse hoan, hoog op poten, n segebok,
en n keunenk dij nait te versloagen is
32 Of ie nou zunder der bie noa te denken over joezulm snaren,
of dat ie t mit opzet doun: hol joe d'haand op mond!
33 As ie melk sloagen, komt ter botter,
as ie ain op neus sloagen, komt ter bloud,
as ie ain in kwoadens sloagen, komt ter roezie.
|
