Spreuken 07
01Denk aaltied aan mien woorden, zeun,
en hol mien regels goud vaast!
02Bewoar dij leefregels, den zelstoe leven,
bewoar aal wat ik die leerd heb as d'appel van dien oog.
03Bind dij om dien vingers,
schrief dij op laai van dien haart.
04Spreek wieshaid aan as dien zuster
en beschaauw verstand as dien beste vrundin.
05Dij baaident zellen die woaren veur vraauw van n aander,
zo'n vremde vraauw mit gladde proatjes.
06Ik ston n moal veur t roam van mien hoes
en keek deur t vènster noar boeten.
07Dou zag ik doar n koppeltje jongelu, van dat nöchtern jonkgoud,
der was ain kwoajong bie, dij haar gain lood verstand.
08Hai stook stroat over, stoef bie d'houk woar zo'n vraauw woonde
en laip op heur hoes òf.
09t Was in twijdonkern, zo tegen oavendstied,
t wer al duuster, sikkom naacht.
10 En joa hur, doar komt ze al op hom òf,
in hoereklaaier, ze het kwoad in t zin.
11 Ze is lewaaierg en drok, haildaal hui,
thoes kin ze t nait oetholden.
12 Ze lopt wat bie stroat, ze scharrelt over t plaain,
op elke houk loert zai om zok tou.
13 Ze gript dij kwoajong bie de kladden,
geft hom vot n smok en zegt mit n bretoal gezicht:
14 "Ik mos mien ovverschulden nog betoalen
en dij heb ik vandoag oflöst.
15 Doarom bin ik noar boeten goan, die in muit,
k heb die zöcht en nou heb ik die vonden.
16 Ik heb mien bèr opmoakt mit bonde dekens
en kleurege loakens van Egyptisch linnen.
17 Mit mirre heb ik mien bèr besprenkeld,
mit aloë en kenail.
18 Kom hier, wie goan ons bezatten aan laifde,
tot mörgenvroug aan tou,
wie willen goud plezaaier van de laifde hebben.
19 Want mien man is nait thoes,
dij is wiedvot, op raais.
20 Hai het n dikke puut geld mitnomen
en hai komt eerst om en bie lichtmoan weer thoes."
21 Zai hoalt hom over mit heur mooie proatjes,
mit heur gladde mond krigt ze hom mit zok mit.
22 Hai lopt zo mor achter heur aan,
as n bol noar slachtbaank,
as n hert dij mit open ogen in n strik lopt -
totdat in ainen n piel in zien lever stekt,
23 as n vogel dij noar t slagnet vlogt
en nait deur het dat dit hom zien levent kosten gaait.
24 Nou den zeuns, luster noar mie,
geef acht op wat ik joe zeg:
25 Loat joe nait verlaaiden op heur wegen,
scharrel nait rond op heur pad.
26 Zai het ja al verschaaiden slachtovvers moakt,
k-wait-nait-houveul binnen deur heur om haals kommen.
27 Heur hoes is ain weg noar t dodenriek,
n weg op ofloop, noar grafkoamers van de dood.
|
