Spreuken 03
01Vergeet nait wat ik die leerd heb, mien zeun,
bewoar mien regels in dien haart.
02Den zelstoe der lengte van doagen aan overholden
en joaren van levent en vree.
03Dat laifde en traauw die nait in steek loaten maggen,
bind dij om dien haals,
schrief dij op laai van dien haart.
04Den kinst respekt en begrip kriegen,
in ogen van God en mensken.
05Most haildaal op de HEER vertraauwen
en nait op dien aigen verstand.
06Betrek hom bie aal dien gangen,
den zel hai dien pad slicht moaken.
07Doe most nait aigenklouk wezen,
heb ontzag veur de HEER,
en t kwoade, goa dat oet weeg.
08Dat is goud veur die, zaalf veur dien wonden,
dat is goud veur die, as bonken die zeer doun.
09Eer de HEER mit aal wastoe hest,
en mit t eerste van dien opbrengsten.
10 Den zellen dien schuren stampensvol worden,
dien paarskoepen zellen overlopen.
11 Kom nait in t èn tegen tucht van de HEER, mien zeun,
most die nait ofkeren astoe n inzeggen van hom krigst.
12 De HEER geft n inzeggen aan ain woar hai wies mit is,
net as n voader aan zien zeun dij hom noa aan t haart ligt.
13 Gelokkeg te priezen is ain dij wieshaid vindt,
n mensk dij inzicht krigt,
14 want winst doarvan is beter as winst van zulver,
opbrengst doarvan is beter as gold.
15 Zai is meer weerd as koralen,
weerdevoller as aal wat ie mor hebben willen.
16 Over ain kaant geft zai n laank levent,
over aander kaant ook nog riekdom en eer.
17 Heur wegen binnen mooi en rusteg
en vredeg is heur pad.
18 Zai is n levensboom veur dij heur vastpakken,
aal wèl heur vastholden, binnen te priezen.
19 Deur wieshaid het de HEER fonnementen van de wereld legd,
deur zien inzicht de hemel oetspand.
20 Deur zien kennes het hai de zeeën ontstoan loaten,
let hai daauw tou wolken oetdruppen.
21 Hol heur veur ogen, mien zeun,
hol bedachtzoamhaid en overleg in eren:
22 dij zellen t levent veur diezulm wezen,
n sieroad om dien haals.
23 Den kinstoe gerust op pad goan,
zunder woaraarns over te stroekeln.
24 Astoe liggen gaaist, huifst nait baang te wezen,
leg die mor deel en goa rusteg sloapen.
25 Huifst nait baang te wezen veur onverwachtse schrik,
of veur t onhaail dat goddelozen toch n moal overkomt.
26 Want de HEER zel aan dien zied stoan,
hai zel die woaren veur strikken en streken.
27 Onthol n aander nait wat hom toukomt,
zolaank astoe der wat aan doun kinst.
28 Zeg nooit tegen dien noaber:
"Goa mor vot en kom mörgen mor ais weer,"
astoe hom t ook votdoalek geven kinst.
29 Beroam gain kwoad tegen dien noaber,
as hai in vol vertraauw noast die woont.
30 Doag nait ain zunder reden veur t gerecht,
as hai die gain kwoad aandoan het.
31 Wees nait ofgunsteg op n man van geweld,
dou zien doaden nooit noa.
32 Want de HEER het n iezelke hekel aan lu,
dij zok niks van hom aantrekken,
mor mit eerleke mensken is hai goie vrunden.
33 Op t hoes van goddelozen ligt vluik van de HEER,
mor zien zegen ligt op t spul van rechtveerdege lu.
34 Mit spotters zel hai vervaast zulm spotten,
mor hai is goud veur lu dij zaacht van oard binnen.
35 Wiezen kriegen eer en aanzain,
mor dwoazen hoalen zok schoa en schaande op haals.
|
