Rechters 19
01In tied, dat ter gain keunenk in Israël was, woonde der wied vot in t baarglaand van Efraïm, n Leviet. Hai haar zok n wichtje oet Betlehem in Juda as bievraauw nomen.
02Mor noa n dikke roezie laip bievraauw bie hom vot en ging weerom noar heur olderliek hoes in Betlehem. Doar was ze vaaier moand.
03Dou ging heur man achter heur heer. Hai wol heur overhoalen om bie hom weerom te kommen. Zien knecht en n span ezels haar e bie zok. Zien vraauw luit hom der in, in t hoes van heur pa. Dij kwam zien schoonzeun mit open aarms in muit.
04Hai drong der bie hom op aan nog wat te blieven. Drij doag bleef man bie voader van zien vraauw op veziede. Zai atten en dronken der en bleven der naacht over.
05Vaaierde dag muik e zok smörgensvroug kloar om òf te raaizen, mor schoonvoader zee: "Eet eerst nog wat, den kinst ter weer tegen."
06Dat ze gingen mitnkander zitten te etendrinken. Doarop zee pa van zien vraauw: 'Blief nog n naacht over. Neem t ter mor ais van."
07Man zat op knipnoagels, mor schoonvoader drong zo aan, dat e toch weer n naacht over bleef.
08Viefde dag wol e weer in ale vrougte opstappen. Mor pa van t wichtje zee: "Eet toch eerst wat, man. Wacht tot zun over hoogste punt hèn is." En weer gingen ze mitnkander aan t etendrinken.
09Dou man aanstalten muik om mit vraauw en knecht vot te goan, zee schoonvoader, pa van t wichtje: "Dag is nou hoast om. Blief hier toch sloapen en neem t ter van. Kiek mor, zun gaait al onder. Blief nog n naacht over. Den kinst mörgenvroug op hoes aan goan."
10 Mor man wol nait laanger. Hai spande ezels in en ging mit vraauw op pad.
Dou ze bie Jebus wazzen, dat op t heden Jeruzalem hait,
11 ston zun al zo leeg, dat knecht tegen zien boas zee: "Doar ligt stad van Jebusieten. Zol we doar gain onderdak zuiken veur vannaacht?"
12 "Nee, hur," zee boas. "Wie sloagen nait òf noar n stad vol vremden, doar ze nait bie t volk van Israël heuren. Wie zetten deur tot Gibea.
13 Meschain hoal we alderdeegs Rama nog wel," zee e tegen knecht. "Den kin we in ain van dij dörpen naacht over blieven."
14 Dat zodounde gingen ze wieder. Net dou zun onder ging, kwammen ze bie Gibea, dat bie Benjamin heurt.
15 Ze gingen stad in om doar naacht deur te brengen. Op maart huil man ho, mor der was gainain dij hom in hoes nuigde om doar te sloapen.
16 Noa n zetje, zun ging al onder, kwam der n ol man aan. Hai kwam net weerom van t laand. t Was ain oet Efraïm en hai woonde as gast in Gibea; t volk van t loug zulm was Benjaminiet.
17 Dou e de raaizegers op t maart gewoar wer, toalde hai heur aan: "Woar goan ie hèn?', vruig e. "Woar kom ie heer?"
18 "Wie binnen op deurtocht," zee Leviet. "Wie kommen van Betlehem in Juda en mouten noar n ploats n stok èn hèn in t baarglaand van Efraïm. Doar kom k heer. Ik heb in Betlehem west en nou gaait t weer op hoes aan. Mor der is hier gain mensk dij mie onderdak geft.
19 Wie hebben alderdeegs ales bie ons: stro en vouer veur ezels en etendrinken veur miezulm en veur mien vraauw hier en mien knecht. Wie hebben naargens verlet om."
20 "Komt ter mor in," was t beschaaid van ol boas. "En mog ie nog woaraarns verlet om hebben, ik heb t wel in hoes. Mor in elks gevaal mout ie vannaacht nait op t maart sloapen goan."
21 Hai nam heur mit in hoes en vouerde ezels. Zai konden vouten wasken en ook etendrinken.
22 Dou ze zok aangenoam te goud deden, laipen manlu van stad bie heur om t hoes tou. Dij deugennaiten bonsden op deur en raipen tegen man van t hoes, dij ol boas: "Loat dij man dij bie die in hoes is, in boeten kommen! Wie willen t mit hom doun!"
23 Boas van t hoes ging noar boeten tou en zee tegen heur: "Mensken, dou toch nait zo schandoaleg! Zukswat kin je toch nait doun! Dij man is ja bie mie te gast.
24 Hier heb ie mien dochter! Dij is nog moagd. En hier, bievraauw van mien gast! Dij kin k wel noar boeten sturen. Pak dij mor en dou mor wat ie willen. Mor dij man hier mag ie zukswat schandoalegs nait aan doun!"
25 Manlu wollen der niks van waiten. Dou pakte Leviet zien vraauw beet en drokte dij noar boeten. Zai schonden heur en wazzen mit heur aan gaang, haile naacht deur. Eerst bie t rodoagen luiten ze heur mit vree.
26 In tied dat t stoadegaan licht wer, sleepte vraauw zok noar smans hoes, doar heur boas tou huil. Veur deur zakte ze in nkander.
27 Dou heur man smörgensvroug deur open dee en noar boeten tou ging om wieder te raaizen, zag e zien vraauw doar liggen - mit handen op drumpel.
28 "Kom, in t èn," zee e tegen heur. "Wie goan vot." Mor aal wat ter kwam, gain antwoord. Man tilde heur op ezel en raaisde òf noar zien loug.
29 Hai was nog nait thoes of hai pakte n mès en snee t liggoam van zien vraauw in twaalf stokken. Dij stuurde hai noar ale kontrainen in Israël.
30 En elk dij t zag, zee: "Zukswat is nog nooit gebeurd! Nog nooit heb we in Israël zukswat beleefd, van dat Isrelieten oet Egypte vandoan trokken tot vandoag aan tou. Bekiek t mor ais. Loat we der mitnkander over proaten en kieken wat of we doun zellen."
|
