Rechters 16
01Op n keer ging Simson noar Gaza tou. Doar zag e n hoer. En hai mit heur in hoes.
02Dij van Gaza kregen der lucht van: Simson is in stad. Ze luiten overaal in stad wachtlopen en bie stadspoort ston n koppeltje kerels op loer. Dij naacht deden ze wieder nog niks. "Bie t rodoagen, den moak we hom dood," rezelvaaierden ze.
03Mor Simson bleef nait laanger liggen as haalfweg naacht. Dou ging e der òf. Aankommen bie stadspoort greep e baaide deurposten beet en ropte ze mit deuren en baalk en aal oet hoaken. Hai pakte t haile boudeltje op nek en laip ter mit vot, noar baargtoppen bie Hebron.
04n Pooske loater wer Simson gek op n vraauw tou t Sorekdaal oet. Delila was de noam.
05Laaiders van Filistijnen der op òf! Ze gingen noar Delila en zeden tegen heur: "Vleem n beetje mit hom om, dat e die vertelt hou of t komt, dat e zo vrezelk staark is en hou of wie hom de boas worden kinnen. Den kin we hom in boeien sloagen, zodat we gain last meer van hom hebben. En den krigstoe van elk van ons elfhonderd sjekel zulver."
06Van dij gevolgen dat Delila aan Simson vruig: "Heur es! Zeg mie ais: hou komt t toch dastoe zo vrezelk staark bist? Woar mouten ze die wel nait mit vastbinden om die machteloos te moaken?"
07"As ze mie boeien zollen mit zeuven vrizze, smuie pezen, den bin k net zo swak as elk aander," zee Simson.
08Keunenks van Filistijnen luiten zokse pezen bie Delila brengen. Doar bon ze hom mit vaast.
09In tied wazzen in koamer der noast n koppeltje Filistijnen beziedkropen om hom te pakken. Dou raip ze: "Simson! Filistijnen!" Mor hai reet pezen stokkend: ze knapten òf, of was t n èndje vlastaauw dat te dicht bie t vuur komt. t Roadsel van zien kracht bleef n vroag.
10 "Wat hest mie nou flikt?" zee Delila tegen Simson. "Hest mie veur gek holden en mie wat veurlogen. Tou, vertel mie toch ais hou ofstoe écht boeid worden most."
11 "As k vastbonden wor mit n nij èn taauw dat nog nooit bruukt is," zee Simson, "den bin k net zo swak as elk aander."
12 Dou pakte Delila n nij èn taauw en bon hom doar mit vaast. Weer raip ze: "Simson! Filistijnen!" In tied wazzen Filistijnen al weer beziedkropen om hom te pakken, mor hai reet taauwen van zien aarms òf, net of t droadjes wazzen.
13 "Doe dust aans niks as mie veur gek holden," zee Delila. "Hest mie wéér wat veurlogen. Vertel mie toch hou ofstoe vastbonden worden most." Simson zee: 'Most vlechten dij k in t hoar heb, ale zeuven inweven in n weefstèl en mit spoul vastzetten. En den ..."
14 Ze dee t en stook ze vaast mit spoul. Dou raip ze: "Simson! Filistijnen!" Simson schrok wakker, ropte spoul lös en trok haile bröd oet nkander, mit scheren en inslag en aal.
15 "En doe zegst dastoe van mie holdst?" zee Delila. "Vertraauwst mie ja èns nait. Dit is nou daarde moal al dast mie bie t bain had hest. Mor mie vertellen woarom dastoe zo vrezelk staark bist, dat is ter nait bie!"
16 Zo bleef ze mor sjantern en vroagen, dag in dag oet. Dat op n duur kon hai der nait meer tegen. Hai legde t lootje
17 en verroadde heur t: "Der het mie nog nooit n scheermès aan kop west," zee e. "Dat is omdat ik al van jongs òf aan as nazireeër aan God wijd bin. As mien hoar ofschoren worden zol, mien kracht zol mie in steek loaten en k zol net zo swak wezen as elk aander."
18 Delila besefte: "Dit moal het hai woarhaid verteld." Ze stuurde keunenks van Filistijnen bosschop: "Nou mout ie der zulm op òf! Hai is mit woarhaid veur de droad kommen." Zai kwammen noar heur tou. Sènten haren ze al in buus.
19 Zai suste hom bie heur op schoot in sloap. Dou luit ze ain kommen en werden Simson aal zien zeuven vlechten ofschoren. Zo kreeg ze hom der onder en was e zien kracht kwiet.
20 "Simson! Filistijnen!" raip ze. Simson wer wakker. Hai wol in t èn kommen en dochde: "k Red mie der wel weer oet, net as aander keren. k Schud ze wel weer van mie òf." Hai haar nait in de goaten dat de HEER hom der nou allain veur stoan luit.
21 Dou grepen Filistijnen hom. Ze stoken hom ogen oet en brochten hom noar Gaza tou. Doar legden ze hom vaast aan twij kopern kettens en wer e in gevangenis zet. Doar mos e meulen draaien.
22 Mor der begunde vot weer hoar op zien koalschoren kop te gruien.
23 Keunenks van Filistijnen kwammen bie nkander veur n groot ovver aan heur god Dagon en om ais fiks feest te vieren. Ze zeden:
"Dij god van ons,
hai het ons Simson,
ons vijand,
in handen speuld."
24 Dou lu Simson zagen, prezen ze heur god:
"Ons god
het ons ons vijand,
dij ons laand verrinnewaaierde,
en riegen van ons om haals brochde,
in handen speuld."
25 Ze werden aal meer ket-oet en zeden tegen nkander: "As we Simson ais hierhèn huilen. Den kon we lagen!" Simson wer tou gevangenis oethoald en zai laagden hom oet. Tussen zoelen van tempel zetten ze hom hèn.
26 Hai vruig aan t jong dij hom bie haand haar: "Zet mie zo hèn, dat ik zoelen aankommen kin doar tempel op rust. Den heb k doar steun aan."
27 Tempel was stìnvol manlu en vraauwlu. Ale keunenks van Filistijnen wazzen der en der wazzen ook nog om en bie drijdoezend manlu en vraauwlu op t dak kropen om Simson te zain en hom oet te sliepen.
28 Mor Simson raip de HEER om hulp: "HEER, mien God, denk toch om mie. Asjeblieft, geef mie nog ain moal kracht genog. Dat ik Filistijnen in ain klap mien baaide ogen betoald zetten kin!"
29 Hai grobbelde noar twij middelste steunpiloaren van tempel en zette zok schrap mit baaide handen.
30 "Mien dood is Filistijnen heur dood!" raip e. Dou drokte hai zo haard as e kon. En doar störtte haileboudel in nkander, bovenop keunenks en aal t aander volk! Dat bie zien staarven muik Simson meer dood, as in zien haile levent.
31 Zien volk en zien haile femilie van voaderskaant, kwam noar Gaza tou om zien liggoam op te hoalen. Ze nammen hom mit en begruiven hom tussen Sora en Estaöl, in t graf van zien pa Manoäch. Twinneg joar haar e in Israël rechter west.
|
