Rechters 04
01Noa Ehud zien dood, deden Isrelieten weer nait wat of de HEER wol.
02Dat de HEER leverde heur over aan keunenk Jabin van Kanaän, dij t in Hasor veur t zeggen haar. Zien legeraanvoerder haitte Sisera. Dij woonde in Charoset-Haggojim.
03Jabin haar negenhonderd iesdern striedwoagens en huil Isrelieten mit geweld onder doem, wel twinneg joar. Doarom raipen Isrelieten de HEER om hulp.
04In dij tied wer Debora rechter in Israël. Dij Debora, aine Lappidot zien vraauw, was profeet.
05Zai huil zitdag onder Deborapaalmboom haalfweg Rama en Betel, in t baarglaand van Efraïm. Doar gingen Isrelieten hèn veur heur rechtszoaken.
06Zai luit Barak, ain van Abinoäm, oet Kedes in Naftali, bie zok roupen. Ze zee tegen hom: "De HEER, God van Israël, bestelt die: 'Trek op noar baarg Tabor en neem tiendoezend man oet Naftali en Zebulon mit.
07Den zel ik Jabin zien legeraanvoerder Sisera mit aal zien striedwoagens en soldoaten noar die tou lokken bie beek Kison. En doar speul ik die hom in handen.'"
08"As ie mitgoan, goa ik ook," gaf Barak beschaaid. "Mor as ie nait mitgoan, goa ik ook nait."
09"Best," zee Debora. "Mitgoan, zeker, ik zel mitgoan mit die. Mor bedenk goud, veur die is ter gain eer aan dizze veldtocht te behoalen. De HEER zel Sisera in handen speulen van n vraauwspersoon." Kòrt en goud: Debora mit Barak op Kedes òf.
10 Barak raip Zebulon en Naftali bie nkander. Tiendoezend man trokken achter hom aan noar Kedes. Debora ook.
11 In de buurt van Kedes, bie ekkelboom in Saänannim, haar Keniet Cheber zien tènten opzet. Dij Cheber haar zok ofschaaiden van aander Kenieten, dij ofstamden van Chobab, Mozes zien schoonvoader.
12 Sisera vernam dat Barak, Abinoäm zien zeun, bie baarg Tabor opgoan was.
13 Sisera luit aal zien striedwoagens, om en bie negenhonderd, en aal t kriegsvolk dat e kriegen kon, van Charoset-Haggojim noar beek Kison oprukken.
14 Debora zee tegen Barak: "Der op òf! Vandoag speult de HEER die Sisera in handen. Haizulm gaait veur die aan." Dou kwam Barak van de Tabor ofzetten mit tiendoezend man achter zok aan.
15 Dou Sisera Barak aankommen zag, brochde de HEER aal zien woagens en zien haile volk dik in toeze. Sisera sprong van zien woagen òf en perbaaierde lopend oet te naaien.
16 Barak zette striedwoagens en kriegsvolk achternoa tot in Charoset-Haggojim aan tou. Ale soldoaten van Sisera sneuvelden, gainent is ter leventeg òf kommen.
17 Sisera was ter tussenoet knepen noar tènt van Jaël tou, Keniet Cheber zien vraauw. Hai wos vanzulm dat Cheber zien femilie en keunenk Jabin van Hasor, vrunden wazzen.
18 Jaël kwam hom in muit. "Komt ter mor in, meneer," raip ze. "Komt ter mor gerust in. Huiven nait baang te wezen." Hai ging bie heur in tènt en zai stopte hom bezied onder n deken.
19 "Mag k wat wotter?" vruig e, "k Heb zo'n dörst." Zai muik leren zak mit melk open, gaf hom drinken en stopte hom weer onder.
20 "Goa bie ingang van tènt stoan," zee e, "As ter den ain aankomt dij vragt of hier ook ain is, den mout ie zeggen van nee."
21 Sisera was daip in sloap valen, zo muid was e. Jaël kreeg dou n tèntpèn en n hoamer en ging verzichteg weer in tènt. Zai sluig tèntpèn dwaars deur zien kop hèn, in grond. Op slag was e dood.
22 Op t aigenste ogenblik dook Barak op. Dij zat achter Sisera aan. Jaël ging hom in muit en zee: "Komt ter in. Ik zel joe de man zain loaten, doar ie noar aan zöcht binnen." Barak ging mit heur in tènt - en joa hur, doar lag Sisera, dood, mit tèntpèn dwaars deur kop hèn.
23 Zo brochde God keunenk Jabin van Kanaän dij dag n dikke neerloag tou tegen Isrelieten.
24 En goandeweg kregen Isrelieten Jabin, keunenk van Kanaän, der aal wieder onder. Net zo laank tot ze hom haildaal van koart veegd haren.
|
