Numeri 36
01Dou kwammen femilie-oldsten van t geslacht dat ofstamde van Gilead, zeun van Machir, zeun van Manasse, ain van geslachten dij van Jozef ofstamden, bie Mozes, laaiders en femilie-oldsten van Isrelieten,
02en ze zeden: "De HEER het joe opdroagen, heer, om t laand deur t löt as aarfdail aan Isrelieten tou te wiezen en de HEER het joe opdroagen om t aarfdail van ons bruier Selofchad aan zien dochters te geven.
03Mor as zai nou vraauw worden van ain van n aandere stam van Isrelieten, den gaait heur aarfdail òf van t aarfdail van ons veurzoaten en wordt t touvougd aan t aarfdail van stam doar ze den tou heuren en wordt t ontnomen aan wat ons deur t löt touwezen is.
04As t den n jubeljoar wordt veur Isrelieten, zel heur aarfdail touvougd worden aan t aarfdail van stam doar ze den tou heuren en wordt t onttrokken aan t aarfdail van ons veurgeslacht. "
05Dou stelde Mozes in opdracht van de HEER vaast: "Stam van Jozefs kinder zegt t goud.
06Dit is wat de HEER besteld het wat Selofchad zien dochters aangaait, noamelk ze maggen traauwen mit wèl heur goud tou liekt, as t mor ain is oet n geslacht van heur aigen stam.
07Zo zel der gain aarfdail van Isrelieten van aine stam bie aandere kommen, want elke Isreliet mout zok hechten aan t aarfdail van zien aigen stam.
08Elk wicht dat in ain van stammen van Israël n aarfdail in bezit krigt, mout traauwen mit ain oet n geslacht van heur aigen stam, dat onder Isrelieten elk t aarfdail van zien veurzoaten in bezit krigt.
09n Aarfdail mag nait van aine stam noar aandere overgoan, want onder Isrelieten mout elk zok hechten aan zien aigen aarfdail."
10 Selofchads wichter deden zo as de HEER Mozes besteld haar.
11 Want Machla, Tirsa, Chogla, Milka en Noä, dochters van Selofchad, binnen traauwd mit zeuns van heur ooms.
12 Ze traauwden binnen femilies oet t geslacht van Manasse, zeun van Jozef. En heur aarfdail bleef zo bie stam doar t geslacht van heur voader tou heurde.
13 Dit binnen geboden en rechtsregels dij de HEER deur Mozes oplegd het aan Isrelieten op Vlakte van Moäb, aan Jordaan bie Jericho.
|
