Numeri 12
01Mirjam en Aäron pruiten over Mozes, noar aanlaaiden van Ethiopische vraauw dij hai traauwd haar. Hai was inderdoad mit n Ethiopische vraauw traauwd.
02Ze zeden ook: "Het de HEER enkeld mor deur Mozes sproken? Het e ook nait deur ons sproken?" En de HEER heurde t.
03Mor Mozes was zaachtzedeg, meer as welk mensk ook op eerde.
04Onverwachts zee de HEER tegen Mozes, Aäron en Mirjam: "Kom mit joen drijent noar soamenkomsttènt tou." Ze kwammen ale drij.
05De HEER doalde deel in n wolkzoel, ging stoan bie ingang van tènt en raip noam òf van Aäron en Mirjam. Dij kwammen ook.
06Hai zee: "Luster wat ik zeg. As ter n profeet van de HEER maank joe is, moak ik mie aan hom bekend in n verschienen, en ik proat mit hom in n dreum.
07Mor zo nait mit mien knecht Mozes. Hai is vertraauwd mit ales van mien hoes.
08Van mond tot mond proat ik mit hom, in n gezicht en nait deur roadsels, en hai aanschaauwt gestalte van de HEER. Woarom heb ie joe der den nait veur woard om zo over mien knecht Mozes te proaten?"
09Glìnneghaid van de HEER kwam opzetten tegen heur en hai ging vot.
10 Wolk ging bie tènt weg en verdold, Mirjam was trovven deur vreterij in hoed, net snij. Dou Aäron zok omdraaide noar Mirjam en zag dat ze trovven was deur vreterij in hoed,
11 zee e tegen Mozes: "Och Mozes, leg zunde dij wie dwoas begoan hebben toch nait op ons.
12 Loat Mirjam toch nait blieven as n doodgeboren kind doar t vlaais al haalf van vergoan is as t op wereld komt."
13 Mozes raip de HEER om hulp mit te zeggen: "O God, moak heur toch weer beter."
14 De HEER zee tegen Mozes: "As heur voader heur in t gezicht spijd haar, zol ze den nait zeuven doag beschoamd stoan? Loat heur zeuven doag boetensloten worden van t kaampement en den weer opnomen worden."
15 Mirjam wer zeuven doag boetensloten van t kaampement en t volk trok nait wieder tot Mirjam weer opnomen wer.
16 Dou trok t volk op tou Chaserot oet, en zette t kaampement op in woestijn Paran.
|