Numeri 08
01De HEER zee tegen Mozes:
02"Zeg tegen Aäron: 'As t licht op luchter zetst, most zain dat ale zeuven lampen noar veuren tou schienen.'"
03Zo dee Aäron t: hai zette lampen zo op luchter dat t licht noar veuren vuil, zuver zo as de HEER Mozes besteld haar.
04Haile luchter was van vout tot bloumbloaren bovenaan, oet ain stok gold dreven. Noar t model dat de HEER Mozes zain loaten haar, het e luchter moakt.
05De HEER zee tegen Mozes:
06"Neem Levieten apaart van aandere Isrelieten en moak heur raain.
07Most zo mit heur te waark goan om heur raain te moaken: besprenkel heur mit wotter dat vrijmoakt is van zunde, noadat ze n scheermès over t haile liggoam hèn hoald hebben en heur goud wosken hebben. Den binnen ze raain.
08Zai mouten den n bol, n jonkbaist, kriegen mit n meelovver van waaitenbloum aanmengd mit olieveneulie, en most zulm nog n bol, ook n jonkbaist, as zundeovver kriegen.
09Den most Levieten veur soamenkomsttènt kommen loaten en most haile gemainschop van Isrelieten verzoameln.
10 Most Levieten veur t aangezicht van de HEER brengen en Isrelieten mouten Levieten haand opleggen.
11 Aäron mout heur noamens Isrelieten aan de HEER aanbaiden as wijovver; den binnen zai der om dainst van de HEER te doun.
12 Levieten mouten haand op kop van jonge bollen leggen en doe brengst ain as zunde-ovver en aander as brandovver aan de HEER om t veur Levieten goud te moaken.
13 Zet Levieten veur Aäron en zien zeuns hèn en droag heur as wijovver op aan de HEER.
14 Zo most Levieten ofzundern van aandere Isrelieten; den heuren Levieten mie tou.
15 Astoe heur raain moakt hest en heur opdroagen hest, treden Levieten doarnoa aan om heur waark bie soamenkomsttènt te doun.
16 Want ze binnen geven, ze werden onder Isrelieten aan mie ofstoan. In stee van alen dij as eerste mouderschoot verloaten, eerstgeborenen van ale Isrelieten, heb ik heur kregen.
17 Want ale eerstgeborenen onder Isrelieten, zowel van mensken as van vij, binnen mienent: op dag dat ik eerstgeborenen van Egypte doodmuik, heb ik heur haailegd.
18 Ik heb Levieten kregen in stee van ale eerstgeborenen in Israël.
19 Ik heb Levieten aan Aäron en zien zeuns doan om veur Isrelieten dainst te doun bie soamenkomsttènt en om t veur Isrelieten weer goud te moaken, zodat ter gain staarfte komt onder Isrelieten as ze te dichtbie t haailegdom kommen."
20 Hierop muiken Mozes en haile gemainschop van Isrelieten Levieten dainstboar. Noar ales wat de HEER aangoande Levieten besteld haar, deden Isrelieten mit heur.
21 Levieten muiken zok vrij van zunde en wosken heur goud; Aäron brochde heur as wijovver veur t aangezicht van de HEER en hai muik t veur heur weer goud. Zo muik e heur raain.
22 Noatied kwammen Levieten om heur dainst te doun bie soamenkomsttènt onder touzicht van Aäron en zien zeuns. Ze deden t zo as de HEER Mozes besteld haar wat Levieten aangaait.
23 De HEER zee tegen Mozes:
24 "Dit is wat veur Levieten geldt: wèl vieventwinneg joar of older is, treedt in dainst om zien waark bie soamenkomsttènt te doun.
25 Van fiefteg joar òf aan mout e opholden mit t waark en gain dainst meer doun.
26 Den kin e zien femilie nog wat helpen bie soamenkomsttènt bie toak dij ze verrichten, mor dainst zulm dut e nait meer. Zo most regeln wat Levieten doun mouten."
|
