Leviticus 12
01De HEER zee tegen Mozes:
02"Zeg tegen Isrelieten: 'As n vraauw n potje krigt en t is n jonkje, den blift ze zeuven doag onraain. Net zo laank as ze onraain is as ze de regels het.
03Op aachtste dag mout t potje besneden worden.
04Den duurt t nog drijendatteg doag eerdat ze weer raain is, as t blouden bie bevalen doan is. In dij tied mag ze niks aankommen dat haaileg is en ze mag nait in t haailegdom kommen.
05As ze n wichtje kregen het, den blift ze vattien doag onraain. Net zo laank as ze onraain is as ze de regels het. Den duurt t nog zesensesteg doag eerdat ze weer raain is, as t blouden bie bevalen doan is.
06As tied dat ze weer raain wordt om is, mout ze - of ze nou van n jonkje of van n wichtje bevalen is - n interram as brandovver aanbaiden en n jonge gewone doef of n törreldoef as zuvernsovver. Ze mout ovverdaaiern noar priester tou brengen, bie ingang van soamenkomsttènt.
07Dij budt de HEER ovvers aan en dut verzoenen veur heur. Den is ze, noa t bloud dat ze kwiet worden is, weer raain.
Dit binnen veurschriften omtrent kroamvraauw, of t nou noa geboorte is van n jonkje of noa geboorte van n wichtje.
08As ze gain ram betoalen kin, mout ze twij törreldoeven mitnemen of twij jonge gewone doeven: ain as brandovver, ain as zuvernsovver. Priester dut verzoenen veur heur en ze zel weer raain wezen.'"
|
