Jona 04
01Mor dit was Jona hail min noar t zin en hai wer helleg.
02Hai beedde de HEER en zee: "Och HEER, k haar t ja wel docht dou ik nog in mien aigen laand was. Ik heb t veurkommen wild en doarom vluchtte ik noar Tarsis. Ik wait ja wel dat ie n genoadege God binnen, dij meedlieden het en nait gaauw kwoad wordt en dij deurhèn goudgunsteg is. Ik wait ja wel dat ie t ter stoer mit hebben onhaail aan te richten.
03HEER, neem mie t levent mor òf, want ik bin laiver dood as dat k leef."
04Mor de HEER zee: "Hestoe t recht om zo kwoad te wezen?"
05Onderwiel was Jona te stad oetgoan en huil zok aan oostkaant van de stad op. Hai wol zok doar n loofhut baauwen en in schaar van hut zitten goan om te zain hou of t mit de stad oflopen zol.
06God, de HEER, dee n wonderboom opschaiten, dij boven Jona oetwos om hom wat schaar te geven en hom van zien vergrèldhaid òf te brengen. Jona was haile blied mit dij wonderboom.
07Mor aanderdoagsmörgens bestelde God n wurm, dij wonderboom aanstook en boom verdreugde.
08Dou zun opkwam, luit God n glìnne oostewind kommen en zun braandde op Jona zien kop zodat hai hoast nait meer wos dat e nog in wereld was. Hai wol dat e dood was: "k Staarf laiver as dat k nog leef!"
09Dou vruig God Jona: "Hestoe t recht om kwoad te wezen om n wonderboom?" Jona zee: "Joa, wis en woarachteg, k bin vergrèld!"
10 Dou zee de HEER: "t Begroot die om n wonderboom, dij die gain muite kost het, dijstoe nait gruien loaten hest, dij der in ain naacht ston en ook in ain naacht weer ofsturf.
11 Zol mie t den nait begroten maggen van dij grode stad Nineve, doar meer as honderdtwinnegdoezend mensken wonen dij t onderschaaid tussen links of rechts nait waiten, en den ook nog aal dij daaiern?"
|