Job 30
01Mor nou hebben ze de gugel mit mie,
lu dij veul jonger binnen as ik,
heur voaders wol k nog nait as heddershond bie mien schoapen hebben!
02Boetendes - wat mout ik mit heur:
ze hebben ja gain kracht in handen.
03Onmachteg van krapte en honger strunen ze t onlaand òf,
in duustern vol onhaail en ellèn.
04Ze zuiken mèl en bloaren van stroeken,
worrels van brem as heur eterij.
05Ze worden tou gemainschop oetstöt,
achternoaroupen of wazzen t daiven,
06ze mouten wonen in roegte van slootswaal,
in holen onder grond en in rotsen.
07Ze roupen en reren in stroekerij,
kroepen bie nkander onder stiekels,
08kerels zunder verstand, volk van niks,
votjagd tou heur laand oet.
09Mor nou hebben ze de spot mit mie,
bin ik t mikpunt van heur proatjes.
10 Ze schudden zok veur mie, moaken dat ze votkommen,
joa, ze spijen mie alderdeegs liek in t gezicht.
11 Want God het mien boog onkloar moakt
en mie in t onlee brocht,
ze binnen nait meer te holden.
12 Aan mien rechterhaand dringt t repallie op,
ze steuten mie bainen onder t gat vot,
ze valen mie aan, moaken mie òf.
13 Ze snieden mie de pas òf, binnen op mien ongelok oet,
en gainain holdt heur tegen.
14 Ze kommen der aan of broesden ze deur n gat in muur,
dwaars deur t puun hèn kommen ze aanrollen.
15 Schrik op schrik van aal zieden,
krekt as deur n störm is mien eer votbloazen,
as n wolk is mien gelok vervlogen.
16 Der zit gain krieg meer in bie mie,
ellèn het mie aal doag in zien greep.
17 Snaachts jagt God mie helse pienen deur de bonken,
t holdt nooit n moal op.
18 Mit ale kracht gript hai mie bie kroag,
hai knipt mie de keel dicht.
19 In t bragel het hai mie smeten,
stof en aask - meer bin ik nait.
20 Ik roup joe aan om hulp, God, mor ie geven gain beschaaid,
ik stoa veur joe, mor ie willen mie nait zain.
21 Ie binnen verniend op mie worden,
ie zitten achter mie heer mit aal joen kracht.
22 Ie tillen mie op en bìnzeln mie vot in störm,
n orkoan schudt mie hènneweer.
23 Joa, k wait wel dat ie mie dood injoagen,
noar t dodenriek doar aal wat leeft hèngaait.
24 Hai stekt gain haand oet noar n mensk in nood,
as dij om hulp ropt in zien ongelok.
25 Mor heb ik zulm nait schraifd om ain dij in nood zat,
was ik nait begoan mit n aarm mensk?
26 Joa, ik rekende op wat gouds, mor t kwoaie kwam,
ik zat te wachten op licht, mor wat ter kwam was duusternis.
27 Ik bin haildaal oetstuur, ik heb gain vree,
dag op dag zai k allenneg mor ellèn op mie ofkommen.
28 Haildaal in t swaart loop ik rond, gain stroaltje licht,
as ik opstoa in vergoadern is t allain mor om om hulp te roupen.
29 Jakhaals is mien bruier, struusvogel mien kammeroad,
dat is ter van mie worden.
30 t Vèl is mie swaart worden en let lös,
t haile lief braandt mie van koors.
31 Mien haarp let niks as kloagtonen heuren,
en mien floit allenneg treurmeziek.
|
