Job 01
01Der was ais n man in t laand Uz. Job was de noam. Man was volmoakt en oprecht, haar ontzag veur God en wol niks mit t verkeerde te doun hebben.
02Zeuven jonges kreeg e en drij wichter.
03Zeuvendoezend schoapen en drijdoezend kemélen haar e, viefhonderd span ozzen en viefhonderd ezels en n haile rieg sloaven en sloavinnen. Man was meer maans as wèl den ook doar in t Oosten.
04Zien jonges haren gewoonte bie toerbeurt bie elk aan hoes n feest te geven. Heur drij zusters nuigden ze den ook om mit heur te etendrinken.
05As zokse feestdoagen west haren, luit Job ze bie zok kommen om heur te zuvern. Hai ging der den smörgens bietieds òf en brochde n brandovver, veur elk van heur ain. Want Job zien zeggen was: "Meugelk hebben mien kinder wel zundegd en God bie zokzulm vervlökt." Zo was Job dat wènd.
06Op n dag kwammen bewoners van hemel om veur de HEER te verschienen. Soatan was ter ook bie.
07De HEER vruig Soatan: "Woar hest west?" "Ik heb omswaalkt over haile wereld," zee Soatan weerom, "en overaal rondstruund."
08De HEER weer tegen Soatan: "Hest ook acht geven op mien knecht Job? Op haile wereld lopt ter gain twijde: man is volmoakt en oprecht, hai het ontzag veur God en wil niks mit t verkeerde te doun hebben."
09Mor Soatan zee tegen de HEER: "Dat is toch ook gain wonder dat Job ontzag veur God het?
10 Heb ie hom nait van ale kanten beschaarmd: zien volk en aal wat of e het? Ales wat hom tou handen oetkomt, heb ie zegend en zien bezit het zok bot slim oetbraaid over t haile laand.
11 Mor trek handen ais van hom òf, tref hom in aal wat e het. Oardeg wis, dat e joe liek in t gezicht vervlökt!"
12 "Goud!" zee de HEER tegen Soatan, "aal wat of e het, is in dien macht. Allain, most mit handen van hom ofblieven!" Dou ging Soatan vot, bie de HEER vandoan.
13 Op n dag wazzen Job zien jonges en wichter bie mekoar bie de oldste thoes aan t etendrinken.
14 Kwam der mie doar toch gainent bie Job mit bosschop: "Ozzen wazzen aan t plougen en ezels laipen der stoef bie in t laand.
15 Dou kwammen Sabeeërs der mit geweld over tou. Ze roofden t aal mit en stoken jongkerels dood mit t sweerd. Bloots ik kon der oetkniepen, k bin ainegste dij joe t vertellen kin!"
16 Dij was nog aan proat of der kwam n aander aan: "Bliksem sluig in, zette schoapen en knechten in ain floister in brand en verteerde heur. Bloots ik kon der oetkniepen, k bin ainegste dij joe t vertellen kin!"
17 Dij was nog aan proat of der kwam n aander aan: "Chaldeeërs hebben in drij koppels ons kemélen overvalen, ze roofden ze mit en knechten stoken ze dood mit t sweerd. Bloots ik kon der oetkniepen, k bin ainegste dij joe t vertellen kin!"
18 Dij was nog aan proat of der kwam n aander aan: "Joen jonges en wichter wazzen aan t etendrinken in t hoes van heur oldste bruier.
19 En och heden, n dikke poest wind kwam aanbroezen over woestijn, batste tegen ale vaaier houken van t hoes aan, dat t störtte in nkander op t jonkvolk en ze kwammen om haals. Bloots ik kon der oetkniepen, k bin ainegste dij joe t vertellen kin!"
20 Dou kwam Job in t èn, scheurde zien bovenklaid, schoor zok kop koal, luit zok op grond valen en boog zok deel.
21 Hai zee: "Noakend kwam ik oet moeke heur schoot, noakend goa ik ter weer hèn. De HEER geft, de HEER nemt, ik pries noam van de HEER."
22 Bie dit ales zundegde Job nait; hai gaf God gain aanlaaiden der over te valen.
|