Exodus 18
01Jetro, priester van Midjan, Mozes zien schoonvoader, haar heurd wat of God aalmoal veur Mozes en veur zien volk Israël doan haar, en benoam dat de HEER Israël tou Egypte oetbrocht haar.
02Doarom ging hai mit Sippora, Mozes zien vraauw, en heur baaide zeuns aan raais. Doudestieds haar Mozes heur veur de wizzeghaid weeromstuurd.
03Ain zeun haitte van Gersom: "Want," haar Mozes zegd, "ik heb n vremde west in n vremd laand."
04Aander haitte van Eliëzer: "De God van mien voader het mie hulpen, hai het mie red van farao zien sweerd."
05Dou Jetro mit Mozes zien vraauw en jonges in woestijn aankwam, bie baarg van God doar Mozes zok n stee zöcht haar,
06luit hai Mozes waiten: "Ik, Jetro, dien schoonvoader, kom noar die tou mit dien vraauw en heur baaide zeuns."
07Votdoalek ging Mozes zien schoonvoader in de muit, boog zok veur hom deel en gaf hom n doetje. Zai vruigen nkander hou of ter mit ging, en dou gingen ze in Mozes zien tènt.
08Mozes vertelde zien schoonvoader aal wat de HEER veur Israël tegen farao en zien Egyptenoars doan haar, ale swoaregheden dij zai onderwegens mitmoakt haren en hou de HEER heur verlöst haar.
09Jetro was glad blied over ale goie dingen dij de HEER veur Isrelieten doan haar en hou de HEER heur van Egyptenoars verlöst haar.
10 Doarom zee Jetro: "Daank aan de HEER dij joe oet de macht van Egyptenoars en van farao verlöst het.
11 Nou wait ik dat de HEER groder is as aal aandere goden. Hai het zain loaten dat e staarker is as Egyptenoars in heur grootseghaid."
12 Dou brochde Jetro n brandovver en n vree-ovver aan God, en Aäron en ale oldsten van Israël kwammen bie nkander om mit Mozes zien schoonvoader n ovvermoal te vieren mit God as getuge.
13 Aanderdoags zat Mozes al weer kloar om recht te spreken veur t volk. t Volk ston veur hom in rieg van smörgensvroug tot soavendsloat.
14 Dou Mozes zien schoonvoader zag wat hai aalmoal veur t volk doun mos, zee e: "Wat hestoe toch mit dat volk ommaans? Woarom mostoe haildaal allenneg rechtszitten holden, terwiel dat aal dij mensken van smörgensvroug tot soavendsloat veur die in rieg stoan?"
15 Mozes antwoordde zien schoonvoader: "Omdat t volk bie mie komt om t oordail van God te heuren.
16 As zai kwezzie onder nkander hebben, kommen ze bie mie om recht te zuiken; zodounde kin ik heur regels en veurschriften van God leren."
17 Mor schoonvoader zee tegen Mozes: "Dat komt nait goud wastoe hier dust.
18 Zo komstoe onder vouten, doe net zo goud as dat volk bie die. Dat waark is veul te swoar veur die, dat kinstoe allenneg nait aan.
19 Luster noar mie, ik zel die goie road geven en God zel die helpen. Doe most bie God veur t volk opkommen, doe most heur kwezzies aan God veurleggen.
20 Wieder mostoe God zien regels en veurschriften aan heur oetleggen, most heur wiezen langs wat pad zai goan mouten en hou ze heur levent inrichten mouten.
21 Kiek om die tou: zuik die onder t volk flinke manlu oet dij ontzag veur God hebben, manlu dij rechtoet en betraauwboar binnen, nait op aigen veurdail oet. En stel dij as laaiders aan over doezend, honderd, fiefteg en tien man.
22 Zai mouten aal doag kloar stoan om recht te spreken veur t volk. Grode kwezzies mouten zai bie die brengen, mor klaaine zoaken kinnen zai zulm oplözzen. Zo binnen zai mit verantwoordelk en krigstoe t makkelker
23 Astoe zo te waark gaaist en God t zo hebben wil, kinstoe dien waark volholden en kin t volk tevreden noar hoes tou goan."
24 Mozes lusterde noar de road van zien schoonvoader en dee wat dij hom zegd haar.
25 Tou hail Israël zöchde hai zok flinke manlu oet en stelde dij as laaiders aan over doezend, honderd, fiefteg en tien man.
26 Aal doag stonden zai kloar om recht te spreken onder t volk, stoere kwezzies brochten zai bie Mozes, klaaine zoaken regelden zai zulm.
27 Dou brochde Mozes zien schoonvoader n èndje vot, dij ging weerom noar zien aigen laand tou.
|
