Exodus 12
01De HEER zee dou in Egypte tegen Mozes en Aäron:
02"Dizze aigenste moand zel veur joe t begun wezen, d'eerste moand van t nije joar.
03Zeg tegen haile gemainschop van Isrelieten: 'Op n tienden van dizze moand mouten manlu zok n laam oetzuiken veur heur femilie, ain laam veur elk hoes.
04As ain hoesholden te luddek is veur n hail laam, den mouten zai n laam dailen mit heur noabers en der rekenschop mit holden, houveul volk der den is en houveul elk op kin.
05Ie mouten n geef laam oetzuiken, n ainjoarege ram. t Mag n schoap wezen, mor ook n segebokje.
06Ie mouten t apaart holden tot n vattienden van dizze moand. De haile gemainschop van Isrelieten zel t den slachten in twijduustern.
07Den mout ie joe wat van t bloud kriegen en strieken dat op baaide deurposten en op bovendrumpel van ale hoezen, doar ie dij oavend eten zellen.
08In dij aigenste naacht mout ie t vlaais boven t vuur broaden en dat opeten mit brood dat nait rezen is, en mit bittere kruden.
09Raauw mag ie t nait eten, ook nait kookt in wotter, mor in ain stok broaden boven t vuur mit kop, poten en ingewand en aal.
10 Zörg der veur dat ter aanderdoagsmörgens niks van over is. Wat ie overholden mout tegen mörgentied opbraand worden.
11 Ie mouten t eten mit opbonden goud, schounen aan en stòk in haand. Heb hoast bie t eten, want t is Pesach veur de HEER.
12 Vannaacht zel ik deur Egypte hèngoan. Ale oldste kinder zel ik doodmoaken, nait allain van mensken, mor ook d'oldsten van t jonkvij. Ale goden van Egypte zel ik stravven. Ik bin de HEER.
13 Dat bloud aan joen hoezen zel n taiken wezen dat ie doar touholden. As ik dat bloud zai, zel ik joen deur verbie goan. Ik zel joe woaren veur dizze leste ploag doar ik Egypte mit stravven zel.
14 Dizze dag zel veur joe n dag om aan te denken wezen. Dij mout ie vieren as n feestdag veur de HEER, van nou òf aan en van older op older. Dat zel veur joe n aiwege wet wezen.
15 Zeuven doag laank zel ie brood eten dat nait rezen is. Op eerste dag mout ie t zoere daig tou t hoes oetdoun. Want ain dij in dizze zeuven doagen brood et dat mit zoere daig toumoakt is, dij zel tou gemainschop oetstöt worden.
16 Op eerste en op zeuvende dag mout ie veur n eredainst bie nkander kommen. Op dij baaide doagen mag ie nait aarbaiden. Allenneg joen eten mag ie kloarmoaken en nait meer as ie neudeg binnen.
17 En aal joar mout ie dat feest vieren, omdat ik op dij dag joen stammen tou Egypte oethoald heb. Dat feest mout ie vieren van older op older en veur aaltied.
18 In eerste moand, van d'oavend van n vattienden òf aan, tot oavend van n ainentwinnegsten tou, mag ie allenneg brood eten dat zunder zoere daig toumoakt is.
19 Zeuven doag laank mag der den gain zoere daig in joen hoes te vinden wezen. Aal dij brood et dat mit zoere daig toumoakt is, mout tou gemainschop van Israël oetstöt worden, netgliek of e nou ain van joen aigen volk is, of n vremde dij bie joe woont.
20 Ie maggen niks eten wat mit zoere daig kloarmoakt is. Allain brood dat nait rezen is mag ie eten, woar ie ook wonen."
21 Mozes raip oldsten van Israël bie nkander en zee tegen heur: "Zuik joe veur joen hoesholdens de beste lammer oet en slacht dij as ovver veur Pesach.
22 Krieg joe den n toefke hysop, stip dat in t bloud dat in n schuddel opvongen is, en striek dat bloud aan bovendrumpel en aan baaide posten van deurkezien. Tot aan mörgentied tou mag gainent van joe boetendeur kommen.
23 De HEER zel deur hail Egypte hèngoan om te stravven, mor as e bloud aan joen deurkezien zugt, zel e dij deur verbie goan. Hai zel doodsengel nait bie joe in hoes kommen loaten om joe te trevven.
24 Hol joe veur aaltied aan dizze regels, ie en joen kinder net zo goud.
25 Ook as ie aankommen binnen in t laand dat de HEER joe touzegd het, mout ie joe aan dizze regels holden.
26 En as joen kinder vroagen wat mit dit gebruuk maind wordt, mout ie heur oetleggen:
27 'Dit is t ovver veur Pesach van de HEER, dij Isrelieten heur hoezen verbie ging en heur woarde in tied dat hai Egyptenoars sluig mit de dood.'" Dou ging t volk op knijen om hom te daanken,
28 en deden ales krek zo as de HEER aan Mozes en Aäron opdroagen haar.
29 Midden in naacht muik de HEER dou ale oldste kinder in Egypte dood, van d'oldste zeun van farao òf aan, tot de zeun van lu dij in gevangenis zatten tou. Ook ale oldsten van t jonkvij muik e dood.
30 Dij naacht vloog farao verschrikt in t èn, en ook zien amtenoars en ale Egyptenoars werden wakker. t Was ain groot gejammer en gereer in hail Egypte, der was ook ja gain hoes doar gain dode was.
31 Farao luit Mozes en Aäron dij aigenste naacht nog bie zok roupen: "Moak joe kloar en moak dat ie votkommen, ie mit aal joen Isrelieten! En ovver aan joen HEER, net zo as ie vroagd hebben.
32 Neem joen schoapen en joen koien mit zo as ie vroagd hebben. Goa mor gaauw vot en vroag joen HEER om zien zegen veur mie."
33 Ook Egyptenoars drongen der stief bie t volk op aan, dat zai zo gaauw as t mor aaids kon, tou t laand oetgoan mozzen: "Aans goan wie aalmoal dood!"
34 Dou nammen Isrelieten heur ongerezen daig mit in heur baktroggen. Zai bonden heur klaaier der omtou en druigen ze op heur scholders mit.
35 Wieder vruigen ze op aanwies van Mozes Egyptenoars heur gold en zulver en heur klaaier òf.
36 De HEER haar t zo moakt, dat Egyptenoars mor gaauw deden wat Isrelieten van heur vruigen, en heur ales toulangden wat ze mor hebben wollen. Zo werden Egyptenoars van heur riekdom ofhulpen.
37 Dou gingen Isrelieten lopend van Raämses noar Sukkot. Zai wazzen mit mekoar zowat zèshonderddoezend man, kinder nait mittèld.
38 Veul vremd volk van alderhande slag trok mit heur mit, en n bult schoapen en koien, de wereld vij.
39 Van t daig dat zai oet Egypte mitnomen haren, bakten ze kouken. Zai haren nait wachten kind tot t rezen was, omreden zai wazzen oet Egypte votjagd en haren zok alderdeegs gain eterij veur onderwegens kloarmoaken kind.
40 Vaaierhonderddatteg joar haren Isrelieten in Egypte touholden.
41 En op dag òf noa dij vaaierhonderddatteg joar, trokken ale stammen van de HEER tou Egypte oet.
42 Dij haile naacht dou de HEER heur vaaileg tou Egypte oetbrochde, het hai over heur de wacht holden. Van dou òf aan geldt veur ale geslachten van Isrelieten dat ze dizze naacht as daank veur de HEER wakker blieven mouten.
43 Wieder zee de HEER tegen Mozes en Aäron: "Dit binnen de regels veur t vieren van t Pesachmoal. Der mag gain vremde aan mitdoun.
44 n Sloaf dij ie kocht hebben, mag der nait eerder aan mitdoun, of ie mouten hom besneden hebben.
45 Mor ain dij bie joe in daghuur is, en ook n vremde dij bie joe woont, mag der nait aan mitdoun.
46 In t aigenste hoes doar t moal kloarmoakt is, mout ie t opeten. Ie maggen niks van t vlaais boetendeur brengen en gain bonk mag ie der van breken.
47 De haile gemainschop van Israël mout dit feest mitvieren.
48 Mor as ter n vremde bie joe inwoont en dij wil ook t Pesachmoal veur de HEER vieren, den mout dij eerst ale manlu van zien hoesholden besnieden loaten. Dij zellen den gelden as Isrelieten. Mor ain dij nait besneden is, mag der nait aan mitdoun.
49 Regels binnen veur aalmoal geliek, veur geboren Isrelieten en veur vremden dij bie heur wonen net zo goud."
50 Ale Isrelieten deden t zo as de HEER aan Mozes en Aäron opdroagen haar.
51 Op dij aigenste dag nog brochde de HEER ale Isrelieten, stam bie stam, tou Egypte oet.
|
