Exodus 08
01Wieder zee de HEER tegen Mozes: "Loat Aäron zien stòk oetsteken over ale daipen, moaren en meren, dat in hail Egyptenlaand kikkers veurndag kommen."
02Aäron stook zien haand oet over aal t wotter van Egypte en votdoalek kwammen kikkers overaal noar boven kroepen, zai bedekten t haile laand.
03Mor Egyptische geleerden speulden dat mit heur teuverderij net zo goud kloar. Dij luiten ook overaal kikkers veurndag kommen.
04Farao luit Mozes en Aäron bie zok roupen: "As ie tou joen HEER beden, of hai mie en mien volk van dij kikkers ofhelpen wil," zee e, "den zel ik joen volk permizzie geven om vot te goan. Den kinnen zai heur ovvers brengen aan joen HEER."
05"Ie binnen farao," antwoordde Mozes, "zeg ie mor, wanneer ik veur joe en joen volk beden zel dat dij kikkers verdwienen mouten, dat ter allenneg nog gounent in t wotter overblieven zellen."
06"Mörgen," zee farao. En Mozes: "Ie zellen t kriegen zo as ie zeggen. As ie mor even waiten willen dat ter gainain zo groot is as de HEER, ons God.
07Kikkers zellen verdwienen bie joe, bie joen hofholden en bie joen volk vandoan. Allenneg in t wotter zellen ze overblieven."
08Dou gingen Mozes en Aäron vot. Mozes beedde tou de HEER over dij kikkers dij e op farao ofstuurd haar, dat e dij verdwienen loaten zol.
09De HEER dee wat Mozes vroagd haar en overaal gingen kikkers dood, in ale hoezen, op binnenploatsen en op t laand.
10 Ze werden deur t volk op bulten veegd, t haile laand stonk der van, alderiezelkst.
11 Dou farao zag dat t gevoar eerst weer over was, wer hai weer koppeg en wol weer nait heuren, net as de HEER al zegd haar.
12 De HEER zee tegen Mozes: "Loat Aäron mit zien stòk op grond sloagen. In hail Egyptenlaand zel t stof dat opjagd wordt, veraandern in neefkes."
13 Dat deden ze. Aäron kreeg zien stòk en sluig der mit op grond en t stof wer neefkes. Aal t stof in hail Egypte veraanderde in neefkes, mensk en daaier, ales zat ter onder.
14 Farao zien geleerden perbaaierden mit heur teuverkunsten ook neefkes te moaken, mor dat kregen ze nait veurnkander. Geliekegoud bleef aal t volk en aal t vij onder de neefkes zitten.
15 Geleerden woarschaauwden farao: "Dat is vervaast n taiken van God!" Mor farao bleef stiefkoppeg en wol weer nait heuren, net as de HEER al zegd haar.
16 De HEER zee vannijs tegen Mozes: "Moak die mörgenvroug op tied kloar en goa farao in de muit. Hai gaait den mainsttieds noar t wotter. Zeg tegen hom oet mien noam: 'Loat mien volk goan, dat ze mie ovvers brengen kinnen.
17 As ie mien volk nait goan loaten, den zel ik op joe, joen amtenoars en joen haile volk bremsters lösloaten. Ale hoezen in Egypte zellen vol bremsters zitten; alderdeegs de grond doar zai op stoan.
18 Mor veur Gosen, laandstreek woar mien volk woont, zel ik dij dag n oetzundern moaken. Doar zellen gain bremsters kommen. Zo zel ie der wait van hebben dat ik de HEER bin, ook in dit laand.
19 Ik zel mit dat taiken onderschaaid moaken tussen mien volk en joenent. En mörgen zel t wezen.'"
20 En zo gebeurde t. De HEER stuurde dikke swaarms bremsters op hoezen van farao en zien volk òf, en over hail Egypte hèn; t laand wer haildaal verrinnewaaierd deur bremsters.
21 Farao raip Mozes en Aäron weer bie zok: "Goa mor ovvers aan joen God brengen. Mor wel in t laand blieven!"
22 "Mie ducht, dat komt nait goud," antwoordde Mozes, "dat zol n dikke aargernis wezen veur Egyptenoars as wie ovvern zollen aan ons HEER. Ze kinnen ons den ja wel doodgooien mit stainen.
23 Wie willen drij dagraaizen wied woestijn in goan en ovvers brengen aan de HEER, ons God, zo as hai ons opdroagen het."
24 "Goud, ik geef joe permizzie," gaf farao tou, "dat ie joen ovvers brengen kinnen in de woestijn, as ie mor nait te wied votgoan. En ie mouten veur mie beden!"
25 "Ik goa votdoalek hèn," zee Mozes, "en ik zel veur joe beden. Mörgen zellen bremsters aalmoal weer verdwienen van joe en joen volk. Mor denk ter om dat ie ons volk nait weer bedraigen deur t vaast te holden."
26 Mozes ging bie farao vot en ging hèn te beden.
27 De HEER dee wat Mozes van hom vruig en ale bremsters verswonnen van farao en van t haile laand. Der bleef gainain over.
28 Mor ook ditmoal wol farao nait tougeven; hai luit Isrelieten nait ofraaizen.
|
