Deuteronomium 28
01Mozes zee: "As ie goud noar de HEER, joen God, lustern en aal zien geboden dij ik joe vandoag geef, zunder mekaaiern noakommen, den zel de HEER, joen God, joe boven ale volken van eerde stellen.
02As ie noar de HEER, joen God, lustern, den zellen aal dizze zegens over joe kommen en joen dail worden.
03Ie zellen zegend wezen in stad en zegend wezen op t laand.
04Zegend wezen zel vrucht van joen schoot, vrucht van joen grond en vrucht van joen vij: wat joen koien brengen en aanwas van joen schoapen.
05Zegend wordt joen körf en joen bakkerstròg.
06Zegend zel ie wezen bie joen kommen en joen goan.
07De HEER zel joen vijanden dij tegen joe opstoan, versloagen en aan joe geven. Over ain weg zellen zai tegen joe optrekken, mor over zeuven wegen veur joe vluchten.
08De HEER, joen God, zel zegen over joe kommen loaten in joen schuren en over ales wat joe tou handen oetkomt. De HEER God zel joe zegen geven in t laand dat hai joe geft.
09As ie veurschriften van de HEER, joen God, onderholden en op zien wegen goan, den zel de HEER joe tou zien haaileg volk moaken zo as hai joe sworen het.
10 Den zellen ale volken van eerde zain dat noam van de HEER over joe oetroupen is, en zai zellen ontzag veur joe hebben.
11 De HEER zel joe roem en rij t goie geven in rieke kinderzegen, in aanwas van joen vij en in vruchten van t laand dat de HEER onder aid joen veurolders touzegd het.
12 De HEER zel zien rieke schatkoamer, de hemel, veur joe opendoun en op tied regen veur t laand geven en aal joen waark zien zegen geven. Aan hail wat volken zel ie oetlainen, mor ie zellen zulm nait lainen huiven.
13 De HEER zel joe aan t bovenèn zetten en nait aan t onderèn. t Zel joe enkeld beter goan en nait minder, as ie lustern noar geboden van de HEER, joen God, dij ik joe vandoag opleg. Kom ze noa, zunder mekaaiern.
14 Ie zellen nait ofwieken, nait noar links en nait noar rechts, van ale geboden dij ik joe vandoag opleg, deur achter aander goden aan te lopen en heur te dainen.
15 Mor luster ie nait noar t woord van de HEER, joen God, noar aal zien geboden en veurschriften dij ik joe vandoag veurhol, den zellen aal dizze vervluikens over joe kommen en joe trevven:
16 Vervlökt zel ie wezen in stad en vervlökt zel ie wezen op t laand.
17 Vervlökt joen körf en bakkerstròg.
18 Vervlökt de kinder dij ie kriegen, opbrengst van joen laand en joen kaalfkes en joen lammer.
19 Vervlökt zel ie wezen as ie der in kommen en as ie in boeten goan.
20 De HEER zel bie ales wat ie doun willen, vluik, verwarren en draaigen over joe kommen loaten en ales in termienen joagen. Hai zel joen ondergang bewaarken om joen minne doaden, zodat ter niks van joe overblift omdat ie hom verloaten hebben.
21 De HEER zel pest onder joe rondgoan loaten, tot ie oetreud binnen oet t laand doar ie hèngoan om t in bezit te nemen.
22 De HEER zel joe sloagen mit teren, koors en swèlderij, mit glìnne hetten en dreugte, ontuug en misoogst, t zel achter joe heer zitten tot ie der onderdeur goan binnen.
23 Hemel boven joe zel van koper wezen en t laand onder joe van iesder.
24 In stee van regen zel de HEER joen laand stof en stoefzaand geven, t zel oet hemel op joe deelvalen tot ie oetreud binnen.
25 De HEER zel joe as ie versloagen binnen, aan joen vijand overgeven. Ie zellen over ain weg tegen hom optrekken mor over zeuven zel ie veur hom oetnaaien. Zo zel ie as n schrikboarend veurbeeld veur ale keunenkrieken op eerde wezen.
26 Joen liek zel vreten wezen veur vogels in lucht en veur daaiern op t laand en gainain zel heur votjoagen.
27 De HEER zel joe sloagen mit swèllen en poesten zo as indertied in Egypte, en mit dreuge en nadde oetslag doar gain kruud veur wozzen is.
28 De HEER zel joe stoapelmaal worden loaten en joe sloagen mit blindhaid en verstandsverbiestern.
29 Op lichtschoon dag zel ie om joe tou tasten zo as n blinde aaltied in duustern rondtast. Op aal joen wegen zel ie ongelokkeg wezen, onderdrokt en beroofd worden, en redden is ter nait.
30 As ie traauwen, zel n aander joen vraauw besloapen. Baauw ie n hoes, den zel ie der nait in wonen. Plant ie n droevetoen, den zel ie der gain vrucht van kriegen.
31 Joen kou zel veur joen ogen slacht worden en ie zellen der nait van eten. Joen ezel wordt joe ofstolen doar ie bie stonden en ie kriegen hom nait weerom. Joen schoapen en bokken worden aan joen vijanden geven en gainain dij joe helpt.
32 Joen zeuns en dochters worden aan n vremd volk overgeven. Joen ogen zellen haile dag noar heur longern, mor ie zellen niks doun kinnen.
33 n Volk dat ie nait kennen, zel t gemoak van joen grond en ales doar ie veur schript en knooid hebben, opeten. Ie zellen aalaan onderdrokt en vertrapt worden.
34 Ie zellen stoapelgek worden as ie zain wat zok veur joen ogen ofspeult.
35 De HEER zel joe aan knijen en schonken, joa van kop tot tonen sloagen mit kwoadoardege swèllen, doar ie nait weer van beter worden kinnen.
36 De HEER zel joe en joen keunenk dij ie over joe aanstellen zellen, weglaaiden noar n volk dat ie en joen voaders nait kend hebben. Doar zel ie aander goden dainen, goden van holt en stain.
37 Ie zellen n ofgries wezen, as veurbeeld steld worden en bespot deur ale volken doar de HEER joe hènlaaiden zel.
38 Ie zellen n bult zoad zaaien, mor t zel nait veul opbrengen, sprinkhoanen zellen t opvreten.
39 As ie droeven verbaauwen, den zel ie der gain wien van drinken of van opsloagen. Roepen zellen t aanvreten.
40 In joen haile gerechteghaid zel ie olievebomen hebben, mor mit eulie zel ie joe nait zaalven. Olieven zellen ofvalen.
41 Ie kriegen zeuns en dochters, mor dij zel ie nait holden. Zai zellen oppakt en wegbrocht worden.
42 Ongedaaierte zel ale bomen en vruchten van joen laand in bezit nemen.
43 Vremde dij bie joe touholdt, zel aal meer overhaand kriegen en ie zellen aal meer in neerloag kommen.
44 Hai zel aan joe lainen, mor ie zellen nait aan hom lainen. Hai zel kop wezen en ie steert.
45 Aal dizze vervluikens zellen over joe kommen, joe achtervolgen en joe inhoalen tot ie oetreud binnen. Omdat ie nait lusterd hebben noar t bevel van de HEER, joen God, om joe te holden aan zien regels en veurschriften dij hai joe opdroagen het,
46 zellen zai maank joe en joen noazoaten veur aaltied n taiken en woarschaauwen wezen.
47 Omdat ie de HEER, joen God, nait mit bliedschop en van haarten daind hebben om joen overvloud,
48 zel ie joen vijanden dainen mouten dij de HEER op joe ofstuurt, in honger en dörst, noakend en mit verlet om ales. Hai zel joe n iesdern juk op nek leggen, tot hai joe oetreud het.
49 De HEER zel van over vèr, van t uterste van eerde, n volk op joe lösloaten as n oarend dij toustöt, n volk doar ie toal nait van verstoan.
50 n Vraid volk dat olden nait ontzugt en gain genoade het mit jongkerels.
51 t Zel wat joen vij brengt en vruchten van joen laand opeten, tot ie oetreud binnen. t Zel gain koorn, wien of eulie veur joe overloaten en niks van wat joen koien brengen of van aanwas van joen schoapen, tot ie oetreud binnen.
52 Dit volk zel aal joen steden belegern, net zo laank dat hoge verstaarkte muren valen doar ie in joen haile laand op vertraauwd haren.
53 Onder belegern en benaauwdhaid dij joen vijand joe aandut, zel ie vrucht van joen aigen schoot eten, t vlaais van joen zeuns en dochters dij de HEER joe geft.
54 Zaachtste en mainst beschaaiden man maank joe zel niks gunnen aan zien bruier, aan zien vraauw doar hai t mainste van holdt en aan kinder dij hai nog overholden het,
55 om gainain van heur wat van t vlaais van zien kinder dat hai et, geven te huiven, omdat hom aans niks overbleven is bie t belegern en in benaauwdhaid dij joen vijand joe in aal joen steden aandut.
56 En zaachtste en mainst beschaaiden vraauw maank joe, dij oet kloare zaachthaid en beschaaidenhaid gain vout op grond zetten duurt, zel wantraauweg kieken noar heur man doar zai t mainste van holdt en noar heur zeuns en dochters,
57 dat zai heur niks geven huift van noageboorte oet heur schoot of van kinder dij zai krigt. Omdat ter niks meer is, zel zai dij in t gehaaim opeten bie belegern en benaauwdhaid dij joen vijand joe in steden aandut.
58 As ie joe nait sekuur holden aan ale woorden van dizze wet dij in dit bouk optaikend binnen en ie gain ontzag hebben veur dizze verheven en ontzagwekkende noam, de HEER, joen God,
59 den zel de HEER joe en joen noazoaten trevven mit swoare sloagen, n swoar lieden zunder èn en kwoadoardege en slepende kwoalen.
60 Hai zel ale kwoalen van Egypte doar ie zo benaauwd veur wazzen, over joe kommen loaten en dij zellen joe te pakken kriegen.
61 Ale soorten van zaiktes en lieden dij nait beschreven stoan in dit wetbouk, zel de HEER over joe kommen loaten, tot ie oetreud binnen.
62 Ie wazzen machteg as steerns aan hemel, mor der zel van joe mor n klaain koppeltje overblieven, omdat ie nait lusterd hebben noar de HEER, joen God.
63 Zo as de HEER der zien behoagen aan haar om joe gelokkeg en machteg te moaken, zo het hai der ook zien behoagen aan om joe te vernailen en oet te reuden. Ie zellen wegropt worden van grond doar ie nou hèngoan om t in bezit te nemen.
64 De HEER zel joe verstreuen onder ale volken, van t aine èn van wereld tot aan t aander tou. Doar zel ie ofgoden van holt en stain dainen goan dij ie nait kend hebben, ie nait en joen veurolders ook nait.
65 Onder dizze volken zel ie gain rust vinden, der zel gain stee wezen doar joen vout rust vindt. De HEER zel joe n haart geven dat van slag rakt, ogen dij longern noar redden en n ziel dij wegkwient van verdrait.
66 t Levent dat veur joe ligt, hangt aan n zieden droadje, dag en naacht zel ie benaauwd wezen omdat ie nait wis van joen levent binnen.
67 Smörgens zeg ie: 'Was t mor oavend!" en soavends: 'Was t mor mörgen!" deur benaauwdens doar joen haart vol van is en vanwege ales wat joen ogen zain.
68 De HEER zel joe op schepen weerombrengen noar Egypte, op wegen doar ik van zegd haar dat ie dij nooit weeromzain zollen. Ie zellen as sloaven en sloavinnen te koop aanboden worden aan joen vijanden, mor n koper zel der nait te vinden wezen."
69 Dit binnen woorden van t verbond dat de HEER aan Mozes opdroagen het om mit Israël aan te goan, noast t verbond dat hai mit heur aangoan het bie Horeb.
|
