Baruch 05
01Jeruzalem, leg t klaid òf van dien raauw en dien ellèn,
droag veur aaid t pronkklaid van God zien glorie,
02sloag mantel van God zien gerechteghaid om,
zet gloriekroon van de Aiwege op kop.
03Want God zel die schittern loaten veur haile wereld.
04Veur aaid is noam dij God die geft:
"Vree-deur-gerechteghaid" en "Glorie-deur-vroomhaid."
05Kom in t èn, Jeruzalem, goa stoan op baarg,
kiek noar t oosten: doar kommen dien kinder aan,
bie nkander roupen deur de Haailege oet ale windstreken vandoan,
blied, dat God om heur denkt.
06Lopend gingen ze bie die vot, mitsleept deur vijand,
mor heur intocht is dij van n keunenk,
nou God heur bie die weerombrengt.
07Want hai onnaaierde: elke hoge baarg en elke stafolde heuvel
mouten slicht moakt worden, en elke kloof volsmeten,
dat t haile laand vlak wordt,
en Israël, deur God zien macht, der vaaileg en wel goan kin.
08Bozzen en ale lekker roekende bomen,
geven aan Israël heur schaar,
op God zien odders.
09Want God zel Israël mit bliedens laaiden
bie t licht van zien glorie,
zien barmhaarteghaid en zien genoade
zel hai heur blieken loaten.
|
