Bijbelrooster voor 10 maart 2023
Numeri 13:1-23: Eerste droeven (biddag veur t gewas)
|
01Dou zee de HEER tegen Mozes:
02"Loat wat manlu noar Kanaän goan te kieken, t laand dat ik aan Isrelieten geven zel, van elke stam ain man, n laaidsman."
03Mozes luit heur goan tou woestijn Paran oet zo as de HEER zegd haar; aal dij manlu wazzen laaidsmannen van Isrelieten.
4-15 Dit binnen noamen: Sammua Zakkurszeun oet stam Ruben, Safat Choriszeun oet stam Simeon, Kaleb Jefunneszeun oet stam Juda, Jigal Josefszeun oet stam Issachar, Hosea Nunszeun oet stam Efraïm, Palti Rafuszeun oet stam Benjamin, Gaddiël Sodiszeun oet stam Zebulon, van Jozefs ofstammelingen Gaddi Susiszeun oet stam Manasse, Ammiël Gemalliszeun oet stam Dan, Setur Michaëlszeun oet stam Aser, Nachbi Wofsiszeun oet stam Naftali, Geüel Machiszeun oet stam Gad.
16 Dit binnen noamen van manlu dij Mozes op pad stuurde om t laand te bekieken. Hosea Nunszeun gaf e noam van Jozua.
17 Mozes stuurde heur op pad om Kanaän te bekieken mit te zeggen: "Goa hier Negev in en trek den baargen in.
18 Kiek wat veur n laand of t is, wat veur volk der woont, of t staark is of swak, of t luddek is of groot.
19 Kiek hou dat t laand is doar ze op wonen, of t goud is of min. En kiek wat veur steden dat t binnen doar ze in wonen, of t kaampementen binnen of bolwaarken.
20 Kiek hou of grond is, best of aarm, en of der aal of nait bomen stoan. Bedapper joe en neem wat van vruchten oet t laand mit." t Was net tied van eerste droeven.
21 Ze gingen op pad en bekeken t laand van woestijn Sin tot Rechob doar je bie Lebo-Hamat kommen.
22 Zai trokken deur Negev en kwammen bie Hebron doar Enakieten touhuilen, Achiman, Sesai en Talmai. (Hebron is zeuven joar eerder baauwd as Soän in Egypte.)
23 Dou ze in t Eskoldaal kwammen, sneden ze n toek mit ain trös droeven òf, dij ze mit twij man aan n stok droagen mozzen, en wat grenoatappels en viegen.
|
Ga naar het volledige bijbelrooster
(Op basis van rooster: www.bijbelgenootschap.nl)
Terug
