Bijbelrooster voor 4 maart 2023
Numeri 11:24-35: Nait zat te kriegen
24 Mozes kwam noar boeten tou en zee tegen t volk wat de HEER zegd haar. Hai zöchde seuventeg manlu oet van oldsten van t volk en stelde heur op om tènt tou.
25 Dou kwam de HEER deel in n wolk. Hai pruit mit hom en nam n dail van gaist dij op hom rustte en gaf dat aan dij seuventeg oldsten. En t vuil veur, zo gaauw as gaist op heur rustte, dat ze aan t profetaaiern gingen. Mor dat deden ze loater nait meer.
26 Twij manlu wazzen in t kaampement achterbleven, ain was n Eldad en aander n Medad; gaist rustte ook op heur, want ze wazzen wel opschreven. En ze wazzen nait noar tènt toukommen, mor toch begunden ze in t kaampement ook te profetaaiern.
27 n Jongkerel runde noar Mozes tou en zee: "Eldad en Medad binnen aan t profetaaiern in t kaampement!"
28 Jozua Nunszeun, van kinds òf aan Mozes zien hulp, zee: "Meneer Mozes, hol ze tegen!"
29 Mor Mozes zee: "Wilstoe veur mie dien best doun? Och was t haile volk mor aan t profetaaiern omdat de HEER zien gaist op heur legd haar."
30 Dou trokken Mozes en oldsten heur terog in t kaampement.
31 Der kwam n wind opzetten, bie de HEER weg. Wind nam kwakkels mit van zee òf en luit heur op t kaampement valen, omtrent n dagraais aine en omtrent n dagraais aandere kaant oet om t kaampement tou, van grond òf zo'n beetje twij èl dik.
32 t Volk was dij haile dag en haile naacht en haile volgende dag in de weer en kreeg kwakkels bie nkander - wèl t minste oppakt haar, kreeg tien mud - en ze legden heur mit vleugels braidoet rondom t kaampement heer.
33 Terwiel dat ze vlaais nog onder koezen haren, nog eer ze t opkaauwd haren, trof glìnneghaid van de HEER t volk, en de HEER sluig heur mit n swoare ploag.
34 Men muik van dij ploats n Kibrot-Hattaäwa, omreden ze haren doar t aalbegereg volk begroaven.
35 Tou Kibrot-Hattaäwa oet trok t volk wieder noar Chaserot, en doar wazzen ze n zetje.
|
Ga naar het volledige bijbelrooster
(Op basis van rooster: www.bijbelgenootschap.nl)
Terug