Bijbelrooster voor 3 maart 2023
Numeri 11:10-23: Gedailde lasten
10 Dou Mozes t volk schraiven heurde, ale femilies elk veur ingang van zien aigen tènt, en de HEER gloeiend glìn wer, von Mozes dat mor min.
11 Mozes zee tegen de HEER: "Woarom behandel ie joen knecht zo? En woarom bin ie mie zo ongenegen dat ie mie last van dit haile volk op scholders leggen?
12 Heb ik dit volk negen moand droagen of heb ik t op wereld brocht, dat ie tegen mie zeggen konden: 'Droag t op schoot zo as n verzörger n potje dragt, noar t laand dat ie heur veurolders mit n aid verzegd hebben.'
13 Woar hoal ik mie vlaais vandoan dat ik dat aan t haile volk geven kin? Ze kloagen ja tegen mie: 'Geef ons vlaais, den eet wie t op.'
14 Op mien allainjes kin ik dit volk nait droagen, omreden t is mie te swoar.
15 As ie zo mit mie te waark goan willen, moak mie den mor dood as ie mie genoadeg wezen willen. Den huif k mien aigen ellèn nait aanzain."
16 De HEER zee tegen Mozes: "Hoal mie seuventeg man oet oldsten van Israël, doarstoe van waist dat ze as verstandege laaiders te waark gonnen. Breng heur noar soamenkomsttènt en loat ze heur doar bie die opstellen.
17 Den zel ik deelkommen en doar mit die proaten. Ik zel wat van gaist dij op die rust nemen en op heur leggen. Ze kinnen den last van t volk mit die droagen. Doe dragst dij nait meer allain.
18 Tegen t volk zelstoe zeggen: 'Wees tegen mörgen raain en ie zellen vlaais eten. Ie hebben ja tegen de HEER kloagd: 'Wèl geft ons vlaais te eten. In Egypte haar wie t goud.' Nou geft de HEER joe vlaais en ie zellen eten.
19 Nait ain dag zel ie eten, gain twij doag en gain vief, gain tien of twinneg,
20 mor n haile moand laank, tot joe t tou neusgoaten oetkomt en ie der flaauw van worden, en wel omreden ie hebben de HEER dij midden maank joe is, ofwezen mit te jammern: woarom bin we toch tou Egypte oettrokken?'"
21 Mozes zee: "Rondom mie heer is dit volk mit zèshonderddoezend lopers en ie zeggen: 'Vlaais zel ik heur geven,' en: 'n Moand laank zellen ze eten.'
22 Houveul schoapen en ooibokken en rundvij mouten der wel nait veur heur slacht worden, wil der ooit genogt wezen. Houveul vis mout ter nait tou zee oetvongen worden, zel der veur heur genogt wezen?"
23 Mor de HEER zee tegen Mozes: "Zol kracht van de HEER te kòrt schaiten? Nou zelstoe zain of mien woord aal of nait bie joe oetkomt."
|
Ga naar het volledige bijbelrooster
(Op basis van rooster: www.bijbelgenootschap.nl)
Terug
