Bijbelrooster voor 2 februari 2023
Spreuken 20:11-20: Twij moaten
11 n Leujong let zok al deur zien doun en loaten kennen
of zien gedrag eerlek en oprecht is.
12 t Oor dat heurt en t oog dat zugt,
aalbaaident binnen ze deur de HEER moakt.
13 Versloap joen tied nait, dat ie nait in aarmoud vervalen,
hol joen ogen open, en ie hebben genog brood te eten.
14 "Spul van niks, goud van niks," ropt de koper,
mor as e der mit votgaait, snaart hai der van.
15 Al het men gold en wait-houveul koralen,
kostelkste sieroad binnen verstandege lippen.
16 Hoal hom zien goud òf, hai het ja börg zegd veur n vremde,
pak hom op as onderpaand veur vremd volk.
17 Brood woar ain aan kommen is deur bedrog, mag hom wel goud smoaken,
mor loater is t net as grind tussen de koezen.
18 Plannen kommen deur overleg tot stand,
n oorlog begunnen, mout mit verzin.
19 Wèl aander lu bie t pad brengt, brengt ook gehaaimen aan t licht,
loat joe nait in mit ain dij löslippeg is.
20 As ain zien voader of moeke vervlökt,
zien levenslaamp zel oetpoest worden as t op t duusterste is.
|
Ga naar het volledige bijbelrooster
(Op basis van rooster: www.bijbelgenootschap.nl)
Terug
