Bijbelrooster voor 1 februari 2023
Spreuken 20:1-10: Brullen en te keer goan
01Wien het de gugel mit n mensk, draank moakt n bult lewaai,
wèl zok doaraan overgeft, is nait wies.
02t Draaigen van n keunenk is net t grommen van n jonge laiw,
wèl hom kwoad moakt, is zien levent nait zeker.
03t Is n eer veur n man as e roezies oet weeg gaait,
mor n onverstand zit ter votdoalek maank.
04Bie haarstdag gaait n loiwams nait aan t plougen,
in tied van inhoalen zöcht e om zok tou, mor den is ter niks.
05Wat n mensk veur plannen het, ligt daipvot in zien haart,
n man mit verstand kin dat boven wotter hoalen.
06n Bult lu snaren van heur aigen betraauwboarhaid,
mor wèl vindt n man woar men van op aan kin?
07n Rechtveerdeg man gedragt zok zo as e is: rechtoet,
zien kinder kinnen der wies mit wezen.
08n Keunenk dij op rechterstoul zit,
kin mit ain oogopslag aal t kwoad zeven en verwaaien loaten.
09Wèl kin zeggen: "Ik heb mien gewaiten schoonholden,
ik bin zuver zunder zunden"?
10 Mit twij gewichten wegen, mit twij moaten meten,
doar het de HEER n gruwelke hekel aan.
|
Ga naar het volledige bijbelrooster
(Op basis van rooster: www.bijbelgenootschap.nl)
Terug