Bijbelrooster voor 4 december 2022
Jesaja 11:1-11: n Toekje oet stronk van Isaï (twijde advent)
01Der schut n toekje op oet stronk van Isaï,
oet zien worrels gaait n telg aan blui.
02Op hom rust de HEER zien gaist,
n gaist van wieshaid en inzicht,
n gaist van overleg en kracht,
n gaist van kennes en ontzag veur de HEER.
03Ontzag veur de HEER,
joa, dat is zien lust en zien leven.
As rechter zel e nait ofgoan op wat e te zain krigt,
hai zel nait oordailen om wat e zeggen heurt.
04Veur t recht van stumpers komt e op,
dij gain meedlieden hebben, straft e
mit sweep van zien mond,
zien haite oam dut min volk de dood.
05Gerechteghaid het e as n raim om zied,
en traauw as n baand om heupen.
06Wolf en laam verkeren mit nkander,
koukaalf en laiwejong vreten gras
mit zien baaident op vetwaaide:
n leujong kin der wel op pazen.
07Koubaist en berewiefke worden kammeroadskes,
laankoet liggen heur jongen bie nkander,
laiw vret heu net as os.
08n Lutje potje zit te speulen bie adder zien hool,
n beudeltje stekt haand in slaang zien nust.
09Gainain dut meer kwoad,
gainent sticht meer verdaarf,
op hail mien haailege baarg nait.
Want haile eerde is vol besef veur de HEER,
net zo vol as zee mit wotter, tot boom aan tou.
10 Dij dag zel t zo heergoan: worrel van Isaï,
staait as n voandel veur noatsies.
Volken binnen der noar op zöcht
en t zel der best wonen wezen!
11 Dij dag stekt de HEER veur twijde moal haand oet
om vrij te kopen wat ter van zien volk over is.
Joa, wat overbleven is oet Assyrië en Egypte,
oet Patros en Nubië, oet Elam, Sinear en Hamat
en van aailanden in zee.
|
Ga naar het volledige bijbelrooster
(Op basis van rooster: www.bijbelgenootschap.nl)
Terug
