Bijbelrooster voor 21 november 2022
t Evengelie volgens Lucas 20:41-21:4: Major donor
41 Hai zee tegen heur: "Hou kinnen ze zeggen, dat de Christus n zeun van David is?
42 David zegt ja zulm in zien Psaalmbouk: 'De Heer het tegen mien Heer zegd: goa rechts van mie zitten,
43 en wacht mor even, den leg ik joen vijanden onder joen vouten.'
44 David nuimt hom dus Heer. Hou kin e den zien zeun wezen?"
45 Dou zee e tegen zien leerlingen, en aal t volk heurde dat:
46 "Woar joe veur schriftgeleerden. Dij maggen geern in laange mantels lopen. Ze binnen der op gesteld dat mensken heur op maart goiendag zeggen. In sinagoge willen ze geern op veurste rieg zitten en bie moaltieden bovenaan.
47 Dij wedevraauwen heur hoezen opeten. En om zok mooier veur te doun, stoan ze laank te beden. Zokke lu zellen swoarder straft worden!"
01Dou hai opkeek, zag e rieke lu heur goaven in ovverkist doun.
02Hai zag ook dat n aarme wedevraauw der twij kopern muntjes in dee en zee:
03"Dizze doodaarme wedevraauw het ter meer in doan as aal aandern, dat wil k joe wel zeggen.
04Dij hebben ja aalmoal geven van wat of ze over haren, mor zai het van heur aarmoudje ales der in doan doar of ze van leven mos."
|
Ga naar het volledige bijbelrooster
(Op basis van rooster: www.bijbelgenootschap.nl)
Terug
