|
01Hai leerde heur in n geliekenis dat ze altied beden zollen en dat nait versloeren loaten.
02Hai zee: "In n stad was n rechter. Dij haar gain ontzag veur God en hai steurde zok aan gain mensk.
03In dij aigenste stad woonde ook n wedevraauw. Dij kwam ieder bòt bie hom mit t verzuik: 'Help mie toch aan mien recht bie mien tegenpertij!'
04n Haile zet wol e nait, mor op n duur zee e bie zokzulm: 'Of heb k ook gain ontzag veur God en steur k mie aan gain mensk, toch zel k heur aan heur recht helpen.
05Ze zoest mie ja aal om kop! Aans kon ze mie op t lest nog wel es n blaauw oog sloagen!'"
06Dou zee de Heer: "Heur toch, wat of dij onrechtveerdege rechter zegt!
07Zol God den nait dijent aan heur recht helpen dij hai oetkozen het, dij bie dag en bie naacht aan hom roupen en noar wèl of hai altied geduldeg lustert?
08Dit wil k joe zeggen: hai zel heur mit n gaauwens aan heur recht helpen. Mor as Menskenzeun komt, zel e den t geleuf vinden in wereld?"
09Mit t oog op gounent dij der op vertraauwden dat ze zulm rechtveerdeg wazzen en ale aandern niks in reken haren, vertelde hai dizze geliekenis:
10 "Twij man gingen noar tempel tou om te beden. Ain was n Farizeeër, aander n tollenoar.
11 Farizeeër ging doar stoan en beedde bie zokzulm: 'O God, ik daank joe dat ik nait zo bin as t aander volk, dat steelt, gemain dut en t mit n aander zien vraauw aanlegt, of ook as dij tollenoar.
12 Ik vast twijmoal in week en geef n tiende van aal mien inkomsten.'
13 Mor tollenoar bleef op n ofstandje stoan. Hai dus alderdeegs zien ogen nait opsloagen noar hemel, mor hai sluig zok aingoal op bòrst en zee: 'O God! Wees mie, zundoar, genoadeg!'
14 Dit wil k joe zeggen: dizze man ging rechtveerdegd weer noar hoes tou. Mor aander nait! Elk ja, dij zokzulm noar veuren dringt, zel achteroetzet worden. Mor wèl of zokzulm achteròf holdt, dij zel noar veuren hoald worden!"
15 Ze brochten ook heur lutje kinder bie hom, dat e dij aankommen zol. Dou leerlingen dat zagen, vuilen ze tegen heur oet.
16 Mor Jezus raip heur bie zok en zee: "Loat dij kinderkes mor bie mie kommen. Hol heur nait tegen! God zien riek is ja veur zokkent.
17 Woarliek, ik zeg joe: wèl of God zien riek nait aannemt as n kind, dij komt ter vervaast nait in!"
18 n Veuraanstoand man vruig hom: "Goie meester, wat mout ik doun om t aiwege levent te aarven?"
19 Jezus zee tegen hom: "Woarom nuim ie mie goud? Gainain is goud, allain God.
20 Ie kennen geboden ja: ie zellen t nait mit n aander zien vraauw aanleggen, nait doodsloagen, nait stelen, gain vaalze verkloaren ofleggen, en ie zellen joen voader en moeke in eren holden."
21 Hai zee: "Dat bin k al van jongs òf aan noakommen."
22 Dou Jezus dat heurde, zee e tegen hom: "Nog ain ding ontbrekt joe. Verkoop aal wat ie hebben en verdail t onder aarme lu. Den zel ie n schat in hemel hebben. Kom den weer hier en goa mit mie!"
23 Dou e dat heurde wer e kant sneu, omreden hai was schatriek.
24 Jezus keek hom aan en zee: "Wat is t ja stoer veur mensken mit geld om in God zien riek te kommen.
25 n Kemeel gaait makkelker deur t oog van n naal as dat n rieke in God zien riek komt!"
26 Dij t heurd haren zeden: "Mor wèl kin den beholden worden?"
27 Hai zee tegen heur: "Wat of mensken nait kinnen, kin God aal."
28 Petrus zee: "En wie den? Wie hebben aal onzent ter aan geven en binnen mit joe goan!"
29 Hai zee tegen heur: "Ik verzeker joe: elkenain dij hoes of vraauw of bruier of olders of kinder verloaten het om God zien riek,
30 dij krigt veul en veul meer weerom in dizze tied, en in toukomst t aiwege levent."
|
