|
01Elia oet Tisbe in Gilead zee tegen Achab: "Zo woar as de HEER leeft, God van Israël, in wèl zien dainst ik bin, der zel kommende joaren gain daauw of regen wezen, aans nait as op mien woord."
02Dou kreeg Elia van God te heuren:
03"Goa hier vot, goa noar t oosten en hol die bezied bie beek Kerit, dij oetkomt in Jordaan.
04Kinst drinken oet beek en roaven heb ik opdroagen die doar eten te brengen."
05Elia ging vot en dee zo as de HEER zegd haar, hai huil tou bie beek Kerit, dij in Jordaan oetkomt.
06Bie mörgen en bie oavend brochten roaven hom brood en vlaais en hai dronk oet beek.
07Mor dou dat n zet zo goan was kwam beek dreug te stoan, omreden t haar in t laand ja nait regend.
08Dou zee de HEER tegen hom:
09"Goa noar Sarefat in Sidon en blief doar. Doar heb ik n wedevraauw besteld om veur die te zörgen."
10 Elia ging aan raais noar Sarefat en dou hai bie stadspoort kwam, zag hai doar n wedevraauw aan t sprikken zuiken. Hai raip heur: "Hoal mie toch n koemke wotter, dat ik drinken kin!"
11 Dou ze votlaip om wotter te hoalen, raip hai heur achternoa: "Neem mie toch ook wat brood mit!"
12 Zai zee: "Zo woar as de HEER, joen God, leeft, ik heb niks meer in hoes as n haandvol meel in pot en n luk beetje eulie in kroek. Ik heb n poar holtjes zöcht en doar zel ik t dommee veur mie en mien zeun mit kloarmoaken. As wie t op hebben mout wie staarven."
13 Elia zee tegen heur: "Moak joe gain zörg. Goa t kloarmoaken zo as ie zegd hebben, mor moak mie der eerst n koukje van en breng mie dat. Veur joe en joen zeun kin ie den doarnoa wat kloarmoaken.
14 Want zo zegt de HEER, God van Israël: t Meel in pot zel nait op roaken en eulie in kroek zel nait minder worden, tot op dag dat de HEER t op eerde regen let."
15 Zai ging vot en dee noar hai zegd haar, en zai haren aal doag te eten.
16 Meel in pot ruik nait op en eulie in kroek minderde nait, krekt as de HEER deur Elia zegd haar.
17 n Zetje loater wer zeun van zien gastvraauw zaik, zo slim, dat hai leste oam oetbluis.
18 Vraauw zee tegen Elia: "Wat dou ie mie aan, godsman? Bin ie bie gevaal noar mie tou kommen om mien zunden veur mie aan t licht te brengen en mien zeun staarven te loaten?"
19 Elia zee: "Geef mie joen zeun!" Hai kreeg hom van heur schoot en druig hom noar bovenkoamer dij hai doar haar en legde hom op zien bèr.
20 Hai raip de HEER aan: "HEER, mien God, dou ie alderdeegs dizze wedevraauw, doar ik as vremde bie te gast bin, dit kwoad aan dat ie heur zeun staarven loaten hebben?"
21 Drijmoal strekte hai zok oet over jong. Hai raip de HEER aan en zee: "HEER, mien God, loat t levent toch weeromkommen in dizze jong."
22 De HEER verheurde Elia, der kwam weer levent in t kind, t leefde weer.
23 Elia nam t kind op, druig t noar beneden en gaf t aan zien moeke. Elia zee: "Kiek, joen zeun leeft."
24 "Nou wait ik," zee vraauw, "dat God joe stuurd het en dat ie echt spreken oet noam van de HEER."
|
