Bijbelrooster voor 1 juni 2022

Jeremia 44:1-10: Der woont gain starveling meer ien Juda

⁰¹Jeremia kreeg dit woord veur ale Judeeërs dij in Egypte woonden in steden Migdol, Dafne en Memfis en in t kontraain van Boven-Egypte: ⁰²"Dit zegt de HEER van de machten, de God van Israël: Ie hebben mit aigen ogen rampen zain dij ik over Jeruzalem en aander steden van Juda brocht heb. n Puunbult binnen ze nou worden, doar gainent meer touholdt. ⁰³Dat komt omreden ze hebben mie mit heur minne doaden offrontaaierd. Ze hebben ovvers brocht en eer bewezen aan aander goden dij ze nait konnen, en ie en heur veurolden net zo min. ⁰⁴Aalweg vannijs heb ik mien knechten, de profeten, stuurd mit bosschop: Loat dij ofgriezelke praktieken! Ik kokhaals der van! ⁰⁵Mor ze wollen nait heuren en hebben nait om mien zeggen geven. Ze binnen nait tou aander gedachten kommen en binnen stief deurgoan mit ovvers brengen aan aander goden. ⁰⁶Dou is mien kwoadens lösbraand. Vuur en vlam heb ik spijd tegen steden van Juda en stroaten van Jeruzalem. Zo binnen ze puunbult en toesternust worden dij ze nou binnen. ⁰⁷Nou den - zo zegt de HEER, de God van de machten, Israëls God: Woarom dou ie dat joezulm aan? Woarom wil ie ondergang van manlu en vraauwlu, kinder en lutje potjes van Juda, dat ter gainent meer overblift? ⁰⁸Woarom taarg ie mie zo mit dij beelden dij je zulm moakt hebben en breng ie in Egypte doar ie nou wonen, ovvers aan aander goden? Of wil ie zulm ook joen aigen ondergang en tou spot en schimp worden veur ale volken op haile wereld? ⁰⁹Heb ie t kwoad den vergeten deur joen voaders en deur keunenks van Juda en heur vraauwlu begoan, of wat ie en joen vraauwlu oetricht hebben in stroaten van Jeruzalem? ¹⁰ Aan dag van vandoag tou muit t gainent, gainain het ontzag veur mie of holdt zok noar veurschriften en geboden dij ik joe en joen veurolden doan heb.

Ga naar het volledige bijbelrooster

(Op basis van rooster: www.bijbelgenootschap.nl)

Terug