Bijbelrooster voor 21 april 2022
Jeremia 29:24-32: Weerwoord
|
24 Tegen Semaja oet Nachlam mostoe zeggen:
25 "Dit zegt de HEER van de machten, Israëls God: Ie hebben op aigen holtje n braif stuurd noar t volk van Jeruzalem, noar priester Sefanja, zeun van Maäseja, en noar aal aander priesters. Doar ston dit in:
26 'De HEER het joe aansteld as priester in stee van Jojada, om opzicht te holden over t hoes van de HEER en om elke haalfmaal dij zok oetgeft as profeet in t blok te zetten en in boeien te sloagen.
27 Woarom heb ie den nait optreden tegen Jeremia oet Anatot, dij zok bie joe oetgeft as profeet?
28 Nou het e ons in Babel n braif stuurd doar in staait: t Zel nog n haile tied duren! Ie mouten hoezen baauwen en der in wonen goan, toenen aanleggen en vrucht ter van eten.'"
29 Dou priester Sefanja dizze braif veurleesde aan profeet Jeremia,
30 kreeg e dit woord van de HEER:
31 "Stuur n braif aan altmoal dij verbannen binnen en zeg tegen heur: Dit zegt de HEER over Semaja oet Nachlam: Omdat Semaja bie joe as profeet optreedt zunder dat ik hom stuurd heb en omdat e bie joe vaalze verwachtens wekt,
32 doarom - zegt de HEER: Ik zel Semaja oet Nachlam en zien noazoaten stravven: gainent van heur zel maank mien volk leven blieven of de goie dingen beleven dij ik veur heur doun zel - godssproak van de HEER. Want hai het oproupen tot rebulie tegen de HEER."
|
Ga naar het volledige bijbelrooster
(Op basis van rooster: www.bijbelgenootschap.nl)
Terug
