001Van David.
Pries de HEER, zeg ik tegen miezulm,
aal wat in mie is, mout zien haailege noam priezen.
002Pries de HEER, zeg ik tegen miezulm,
vergeet gainain van zien weldoaden.
003Dij aal dien zunden vergeft,
die beter moakt van aal dien kwoalen,
004dij dien leven redt van t graf,
die kroon opzet van traauwe laifde en ontfaarmen,
005dij dien levent rij bedailt mit t goie,
dat dien jonkhaid weeromkomt as bie n oarend.
006De HEER dut wat rechtveerdeg is,
hai dut recht aan lu dij vertrapt binnen.
007Hai het zien wegen bekendmoakt aan Mozes,
aan Isrelieten zien doaden.
008Barmhaarteg en genoadeg is de HEER,
nait gaauw kwoad en meer as traauw.
009Hai blift nait aal verkloagen,
hai zel nait aiweg vergrèld blieven.
010 Hai dut ons nait noar ons zunden,
en vergeldt ons nait noar ons mizze doaden.
011 Want zo hoog as hemel boven eerde is,
zo geweldeg is zien gunst veur wel ontzag veur hom hebben.
012 Zo wied as t oosten van t westen is,
zo wied dut hai ons zunden bie ons vandoan.
013 Zo as n voader barmhaarteg zok over kinder ontfaarmt,
zo ontfaarmt de HEER zok over wèl ontzag veur hom hebben.
014 Hai wait hou dat wie moakt binnen,
wie binnen ja stof.
015 n Mensk - as gras binnen zien doagen,
as n bloum zo bluit hai,
016 n zuchtje wind en hai is ter nait meer,
en t stee doar hai ston ken hom nait meer.
017 Mor gunst van de HEER is aiweg en zel aaltied blieven
veur wèl ontzag veur hom hebben,
zien gerechteghaid geldt veur kinder en kindskinder,
018 veur wèl zien verbond bewoaren,
veur wèl aan zien geboden denken om der noar te doun.
019 De HEER het zien troon in hemel deelzet,
as keunenk heerst hai over ales.
020 Zegen de HEER, ie aal zien engels,
ie staarke helden, dij doun wat hai zegt,
deur te heuren noar t geluud van zien woord.
021 Zegen de HEER, ie aal zien legers,
dij hom dainen en doun wat hai wil.
022 Pries de HEER, ie aal zien waarken,
op ale steeën doar hai regaaiert.
Loat aal wat in mie is de HEER priezen.
|