Bijbelrooster voor 11 maart 2022
Amos 6:8-14: Blift der nog ain over?
08God, de HEER, sweert: Zo woar as ik leef, van de pronk en stoat van t volk van Jakob bin ik stìnzat, en zien pelaaizen dij hoat ik. Heur stad mit ales der in geef ik over aan heur vijanden.
09Ook al binnen der den nog mor tien man over in t leste hoes dat nog in t èn staait, dij zellen ook altmoal omkommen.
10 En liggen der aaltemets n poar doden dij nog tou t hoes oet mouten, en ain vragt zien kammeroad dij in t achterhoes touholdt: "Ligt doar bie die nog ain?" en dij ropt weerom: "Nee, gainent meer." Den zegt aander: "Stil toch jong, en nuim de HEER zien noam nait!"
11 Dou der denk om: de HEER huift zien mond ja mor open te doun, en hoezen van ale mensken van hoog tot leeg valen in puun en groezelementen.
12 Kinnen peerden asmis over stainrotsen in gelop lopen, of kin men zee omplougen mit n span ozzen? Mor ie hebben t recht wel veraanderd in vergif, en vruchten van rechtveerdeghaid zo bitter moakt as gaal!
13 Ie snaren: "Wie hebben Lo-Debar ja veroverd! Wie hebben staark genog west om Karnaïm in te nemen!"
14 Mor de HEER, d'aalmachtege God zegt: Dou der denk om, ie Isrelieten: Ik stuur n volk op joe òf, dij zel joen haile laand van t aine noar t aander èn onder vouten lopen.
|
Ga naar het volledige bijbelrooster
(Op basis van rooster: www.bijbelgenootschap.nl)
Terug