Bijbelrooster voor 3 januari 2021

Genesis 12:1-9: Vertrektaiken

⁰¹De HEER zee tegen Abram: "Goa oet dien laand, bie dien femilie weg en oet dien voaders hoes noar t laand dat ik die aanwiezen zel.
⁰²Ik zel die tou n groot volk moaken. Ik zel die mien zegen geven en dien noam groot moaken,
en wees n zegen.

⁰³Dij die zegent, krigt mien zegen, dij die vervlökt, zel ik vervluiken.
Ale geslachten op eerde
zellen in die zegend worden."
⁰⁴Abram ging vot, zo as de HEER tegen hom zegd haar. Lot ging mit. Abram was vievenseuventeg joar dou hai oet Charan wegtrok. ⁰⁵Abram nam zien vraauw Sarai mit en Lot, zeun van zien bruier, en ale goud en t dainstvolk dat ze in Charan kregen haren ook. Zai gingen aan raais en kwammen in Kanaän. ⁰⁶Abram trok deur t laand hèn tot aan t haailegdom van Sichem, aan aikenboom van More tou. Doudestieds woonden Kanaänieten in t laand. ⁰⁷Dou verscheen de HEER aan Abram en zee: "Aan dien noageslacht geef ik dit laand." Abram baauwde doar n altoar veur de HEER, dij aan hom verschenen was. ⁰⁸Hai trok doarvandoan noar baargen aan oostkaant van Betel. Hai zette zien tènt op, mit Betel in t westen en Ai in t oosten. Hai baauwde doar n altoar veur de HEER en raip noam van de HEER aan. ⁰⁹Dou trok Abram aalaan wieder noar de Negev.

Ga naar het volledige bijbelrooster

(Op basis van rooster: www.bijbelgenootschap.nl)

Terug