Bijbelrooster voor 15 maart 2020
Prediker 4:17-5:8: Belofte moakt schuld (zundag oculi)
|
17 Wait wastoe dust astoe noar t hoes van God gaaist. Kinst ter beter hèngoan om te lustern as om ovvers te brengen, zo as onwiezen dij hail nait waiten dat ze verkeerd doun.
01Wees nait te rad mit dien mond, denk eerst goud noa veur dastoe tegenover God wat zegst. God is ja in de hemel en doe bist hier op wereld, wees doarom zuneg mit dien woorden.
02Zo as dreumen kommen van te veul drokte, net zo brengt veul geproat dom gekwedel mit zok mit.
03Astoe God wat touzegst, mostoe der nait mit wachten om dat te doun. God het niks op mit onwiezen. Wastoe touzegst, most doun.
04Men kin beter nait beloven, as aal beloven en nait noakommen.
05Zörg der veur dastoe deur te veul geproat nait in schulde te stoan komst, den huifstoe ook nait tegen priester te zeggen dat t nait mit opzet was. Woarom zol God kwoad worden mouten om wastoe zegst en den verrinnewaaiern wastoe moakt hest?
06Want der is veul dreumerij over niks, en der binnen n bult loze woorden. Heb mor ontzag veur God.
07Verboas die der nait over astoe zugst dat in t laand de mindere man verdrokt wordt en t recht en de gerechteghaid mit vouten treden. Amtenoars van hoog tot leeg holden nkander haand boven kop.
08Bie zukswathèn is n keunenk dij oog veur d'akkers het, n groot veurdail veur n laand.
|
Ga naar het volledige bijbelrooster
(Op basis van rooster: www.bijbelgenootschap.nl)
Terug
