Bijbelrooster voor 6 november 2019
2 Samuel 6:1-11: Stee moaken en joen stee waiten (dankdag veur t gewas)
|
01Op n keer raip David ale keurtroepen van Israël, dattegdoezend man, bie nkander.
02Hai ging mit heur noar Baäla in Juda om aark van God op te hoalen en noar Jeruzalem te brengen. Aark dragt ja de noam van d'Aalmachtege HEER, dij zien troon het op vleugels van cherubengels dij bovenop aark stoan.
3-4 Zai huilen aark oet t hoes van Abinadab op heuvel en zetten hom op n nije woagen. Uzza en Achio, zeuns van Abinadab, mozzen woagen gelaaiden. Achio laip veurop.
05David en ale Isrelieten daansden wat ze konden veur aark van God aan en zongen oet volle bòrst veur de HEER bie meziek van citers, haarpen, trommen, roatels en simboalen.
06Mor dou ze bie dörsdeel van Nachon kommen wazzen, gleden ozzen oet. Uzza stook gaauw haand oet om aark vaast te holden.
07De HEER wer zo kwoad op Uzza dat hai hom op aigenste stee, noast aark, doodvalen luit omdat e zo onbedocht west haar.
08David wer kwoad, omdat de HEER Uzza zo swoar straft haar. Hai nuimde dij stee Peres-Uzza, en nog altied hait dat doar zo.
09Mor tougelieks wer David zo benaauwd veur de HEER, dat hai zee: "Kin aark van God nog wel bie mie in Jeruzalem kommen?"
10 Doarom besloot David om aark nait mit te nemen noar Davidstad. Hai zette hom eerst bie Obed-Edom hèn, dij oet Gat kwam.
11 Doar bleef e drij moand stoan. De HEER gaf zien zegen aan Obed-Edom en zien haile hoesholden.
|
Ga naar het volledige bijbelrooster
(Op basis van rooster: www.bijbelgenootschap.nl)
Terug
