Bijbelrooster voor 5 mei 2019
Hooglied 2:8-15: Soamenkomst (bevrijdensdag)
08Ik heur mien schat aankommen.
Kiek! Doar komt e,
hai springt over baargen,
en daanst over bulten.
09Mien laiverd liekt wel n springbok
of t jong van n hert.
Kiek! Doar staait e al bie ons hoes.
Hai kikt deur t roam,
hai kuurt deur troalievènster.
10 Hai zegt wat, hai proat tegen mie:
"Kom, mien wicht, mien aldermooiste schat,
kom bie mie!
11 Winter is ja verswonnen,
en regentied is verbie.
12 In t veld staait ales in blui.
Tied van zingen komt aan,
overaal heurst töddeldoefkes.
13 Eerste viegen kriegen al kleur,
wienstòkken stoan in geurege blui.
Kom, mien wicht, mien aldermooiste schat,
kom bie mie!
14 Doe bist mien doef in n glief van n rots,
in holen van baargwand bezied.
Kom noar veuren, loat die zain,
loat dien stem toch heuren.
Dien stem klinkt ja zo oardeg,
doe zugst ter ja zo aldernuverst oet."
15 Ie mouten veur ons dij vozzen vangen,
dij lutje verniende vozzen,
dij ons droevetoenen vernailen,
net nou ze in blui stoan.
|
Ga naar het volledige bijbelrooster
(Op basis van rooster: www.bijbelgenootschap.nl)
Terug