Bijbelrooster voor 15 april 2019

Hosea 5:1-7: Vaalstrikken

⁰¹Luster, priesters! Heur tou, oldsten van Israël! Lu aan t hòf van keunenk, luster aandachteg! Ie goan toch over rechtsproak? Mor in Mispa heb ie mien volk in vaal lopen loaten, en op Tabor n klapnet veur heur opzet. ⁰²n Verroaderlieke daibe vaalkoel heb ie groaven. Mor ik zel joe wel kriegen, joe! ⁰³As ain Efraïm ken, bin ik dat wel, en Israël is veur mie n open bouk. Mor nou is Efraïm mie ontraauw worden en het Israël zok begleerd. ⁰⁴Doaden stoan heur in weeg om weerom te kommen bie God: ontucht het heur in zien macht, doardeur is de HEER n vremde veur heur worden. ⁰⁵Israël zien aigenwiezeghaid zel tegen homzulm getugen, Efraïm stroekelt over zien aigen minne doaden. Alderdeegs Juda wordt in zien vaal mitsleept. ⁰⁶As ze den mit heur ovverdaaiern aan rit goan om de HEER te zuiken, zellen ze hom nait trevven. Hai zel zok veur heur bezied holden. ⁰⁷Ze hebben de HEER ontraauw west en hebben onechte kinder wonnen. Mor veur Nijmoan zel t oet en doan wezen: mit heur en t laand.

Ga naar het volledige bijbelrooster

(Op basis van rooster: www.bijbelgenootschap.nl)

Terug