22 Kom weerom, ofvaleg volk,
den zel ik joe ofhelpen van joen min gedrag.
Den zel ie zeggen:
'Hier bin we! Wie kommen bie joe weerom,
want ie, de HEER, binnen ons God.
23 Joa, t is zo, t gedounte op högten en op baargen is bedrog.
Joa, wis en woar, bie de HEER, ons God, is ter behold veur Israël.
24 Van jongs òf aan verslindt Baäl ons volk heur femiliebezit,
schoapen en koien, zeuns en dochters.
25 Wie liggen der bie veur schandoal,
doeknekt onder oneer,
want tegen de HEER, ons God, heb we zundegd,
wiezulm en ons veurolden,
van kinds òf aan, tot vandoag aan dag tou.
Wie hebben nait lusterd noar de HEER, ons God.'
01As ie weerom willen, Israël,
mag ie weer bie mie kommen
- godssproak van de HEER.
As ie ofgoden oproemen
en der nait veur mie vandeur goan,
02as ie sweren: 'Zo wis as de HEER leeft',
en doun wat echt is, eerlek en woar,
den zellen de volken zok mit hom gelokkeg priezen,
joa, ze zellen blied wezen mit hom.
|
