Bijbelrooster voor 1 februari 2019
Ester 6 : 1 - 14: n Te grode boksem aan
|
01Aigenste naacht kreeg keunenk gain wenk in ogen. Hai luit t bouk mit kronieken brengen en dij werden keunenk veurlezen.
02Dou men tegenkwam wat Mordechai aan t licht brocht haar over Bigtan en Teres, twij hofdainders dij tou deurwachters van keunenk heurden, en dij keunenk Ahasveros van kaant moaken wollen,
03zee keunenk: "Wat veur eer en onderschaaiden het Mordechai doarveur kregen?" Hofdainders van keunenk zeden: "Gainent."
04Doarop vruig keunenk: "Wèl is ter in veurhof?" Nou was Haman krekt in t boetenste veurhof kommen om tegen keunenk te zeggen dat hai Mordechai spietsen zol op n poal dij hai veur hom opricht haar.
05Hofdainders zeden: "Haman is in veurhof." "Loat hom der in," zee keunenk.
06Dou Haman der in kwam, zee keunenk tegen hom: "Wat zel men doun mit ain dij keunenk onderschaaiden wil?" Haman dochde bie zokzulm: Wèl aans zol keunenk groder eer bewiezen willen as mie?
07Hai zee tegen keunenk: "Man dij keunenk eer bewiezen wil,
08zol men n keunenkliek klaid brengen mouten dij keunenk zulm droagen het en peerd doar keunenk zulm op rieden dee en dij n keunenkskroon op kop het.
09Dat klaid en dat peerd zol men aanvertraauwen mouten aan ain van keunenk zien vorsten, van zien hoogste heren. En dij zol hom dij keunenk eer bewiezen wil dat klaid aantrekken mouten en hom op peerd over t stadsplaain rieden loaten mouten en den oetroupen: 'Zo wordt doan mit ain dij keunenk eer bewiezen wil!'"
10 Dou zee keunenk tegen Haman: "Hoast joe, hoal dat klaid en dat peerd, dou as ie zegd hebben en dou zo mit Jeud Mordechai, dij in poort van keunenk zit. Loat niks achterwege van aal wat ie zegd hebben."
11 Dou huil Haman dat klaid en dat peerd en hai trok Mordechai t klaid aan en luit hom over t stadsplaain rieden. "Zo wordt doan mit ain dij keunenk eer bewiezen wil!" raip e.
12 Mordechai ging weerom noar poort van keunenk, mor Haman muik dat hai thoes kwam, versloagen, kop luit hai hangen.
13 Hai vertelde aan zien vraauw Zeres en aal zien vrunden wat hom overkommen was. Zien roadslu en zien vraauw zeden dou tegen hom: "As dij Mordechai veur wèlstoe nou n knijvaal moaken most tou t volk van Jeuden heurt, den kinst niks tegen hom oetrichten. Joa, krekt aansom: doe zelst alderdeegs haildaal veur hom valen."
14 Zai wazzen nog mit hom aan proat of doar kwammen hofdainders van keunenk der al over tou en zo gaauw as t kon, brochde men Haman noar t feestmoal dat Ester kloarmoakt haar.
|
Ga naar het volledige bijbelrooster
(Op basis van rooster: www.bijbelgenootschap.nl)
Terug
