Sikkom vatteg joar is ter aan vertoalen van biebel ien t Grunnens waarkt. Meer as fiefteg vertoalers hebben pro Deo oet de brontoalen biebel overzet ien geef Grunnegers.
n Kerwaai dat zien weergoa wat omvang en duur aanbelangt iern pervinzie Grunnen nait kent en doar elke Grunneger, geleuveg of nait, grootsk op wezen kin.
t Overzetten van biebel ien t Grunnegers viendt zien oorsprong ien Grunneger Dainsten - kerkdainsten ien streektoal. Om ien dizze dainsten te bruken ontston der vroag noar biebelteksten en laiden ien t Grunnegers.
Van 1973 òf is ter onder permoters van Liudgerstichten waarkt aan t overzetten van biebel: t biebelvertoalkerwaai.
Vertoalers hebben der veur kozen woorden en waarkwoordsvörms te bruken dij ien ale Grunneger kontrainen begrepen worden kinnen.
Oetgoave, doar zowel canonieke as deuterocanonieke bouken ienstoan, kwam veurnkander ien soamenwaarken mit t Nederlands Bijbelgenootschap, de Katholieke Bijbelstichting, het Vlaams Bijbelgenootschap en de Vlaamse Bijbelstichting.
t Eerste exemploar zel aanlangd worden op
ZOTTERDAG 25 OKTOBER ien Martinikerk ien Stad
om twij uur smirregs (kerk open om haalf twij).
Tiedens prezentoatsie zellen perf.dr. Wout van Bekkum en perf.dr. Anne van der Meiden spreken over vertoalen (van biebel) ien streektoal.
t Wereldberoemde örgel ien Martinikerk wordt bespeuld deur örgenist Pieter Pilon.
Noa t aanlangen is ter tied, om onder wat etendrinken, mit nkander ien t koor van kerk te proaten.
En vanzulf: biebel is doar ook te koop!
Pries zel om en bie EUR 45,00 liggen - sikkom vergees veur zo'n mooi bouk ...
t Verschienen van Biebel ien t Grunnegers - n uniek gebeuren.
Ie kommen ook toch?
Ie binnen welkom!