Sefanja 3

En toch ... t wordt aal weer goud

⁹ "Mor den," zegt de Heer,
"zel Ik bie de volken heur onzuvere lippen ¹⁹ veraandern in zuvere lippen,
dat zai altmoal Mie, de Heer, aanroupen
in stee van heur ofgoden,
en mie ainsgezind eer toubrengen.
¹⁰ Alderdeegs van hail wied vot,
oet kontraainen aan gun kaant van revieren van Kusj, ²⁰
zellen mensken kommen
om Mie te vereren
en ovvers te brengen.
¹¹ Den huif ie joe ook nait meer schoamen
veur aal wat ie vrouger tegen Mie oetricht hebben;
den zel Ik ja dij dikke snakkers dij der bie joe binnen,
votjoagen.
Gainain zel meer zien trötse kop omhoog steken
op mien haailege baarg Sion. ²¹
¹² Den moak Ik dat ter bie joe aans niks overblift
as n volk, nederg en bekweem
dat onderdak zöcht bie Mie, de Heer.
¹³ Zai zellen nkander gain kwoad meer doun.
Leugen en bedrog, doar zel gain sproak meer van wezen.
Zai zellen wezen as schoapen
dij vredeg lopen te groazen en in t gras liggen
zunder dat ain heur opjagt."