Sefanja 3

t Kin nait op!

¹⁴ Sion, mien wicht,
roup t oet van bliedschop!
Jubel, o Izrel!
Jeruzelem, mien wicht,
wees van haarten blied en oetgeloaten!
¹⁵ De Heer het joen tirannen votjagd,
joen vijanden votveegd.
De Heer, keunenk van Izrel, is joen keunenk.
Ie huiven naargens meer baang veur te wezen.
¹⁶ Dij dag zel der tegen Jeruzelem zegd worden:
Nait benaauwd wezen, Sion!
Moudveren nait zakken loaten!
¹⁷ De Heer, joen God, is ja bie joe
- n held dij joe redt.
Hai is slim wies mit joe.
Zien haart lopt over van laifde veur joe.
Hai zingt haardop van bliedschop, of was t zien bruloft.

¹⁸ De Heer zegt:
"Ik moak joe vrij van t onhaail. ²²
Schimp en schaande dij op joe drokt,
doar is t mit oflopen.
¹⁹ Ik beloof joe: tied komt
dat Ik schoon laai moaken zel
mit aal dij joe der onder holden.
Ik help dij nait mitkommen kinnen.
Ik breng dij oet nkander jagd binnen
weer bie mekoar,
zo as n hedder zien kreupele en ofdwoalde schoapen.
Ik zel der veur zörgen
dat heur eer en glorie toubrocht wordt
in haile wereld doar ze vrouger mit nek aankeken werden.
²⁰ Den zel Ik joe weer thoesbrengen ²³
en weer bie nkander brengen.
Zeker woar:
Ik zel joe tou eer en glorie brengen
bie ale volken van wereld,
as Ik n omkeer breng in joen löt.
Dat zel ie nog mit aigen ogen zain."
Dat zegt de Heer.