Sefanja 3

Laaiders van Jeruzelem kriegen n dikke woarschaauwen

¹ Onhaail zel der kommen over dij rebelse stad,
dij deurhèn verdurven stad
vol geweld en onrecht,
² dij nait lustern wil,
dij zok deur gainain de wet veurschrieven let,
dij nait op de Heer vertraauwt
en niks van Hom waiten wil.
³ Heur laaiders: brullende laiwen binnen t;
heur richters: wolven dij soavends op roof oetgoan
en nog gain bonkje liggen loaten tot aanderdoagsmörgens;
⁴ heur profeten: swetsers en laigenbaisten;
heur priesters: haaileg of onhaaileg, ¹⁴ dat kin heur niks schelen,
ze vertrappen wet van God.
⁵ Mor de Heer dij in Jeruzelem woont,
Dij is rechtveerdeg.
Dij geft elk zien liek en recht; doar kin je elke mörgen van op aan, ¹⁵
net zo wis as dat t ale mörgens weer licht wordt.
Aal dij schandoalege gemaineghaid is Hai gram.

⁶ De Heer zegt:
"Aander volken ¹⁶ heb Ik oetreud
en heur bolwaarken vernaild.
Heur wegen liggen der ainzoam en verloaten bie,
gain mensk komt ter meer laans.
Heur steden liggen in puun,
doar woont gainain meer.
⁷ Dou dochde Ik:
'Jeruzelem, nou zelstoe wel ontzag veur Mie hebben
en der van leerd hebben.
Nou zellen ze doar in Jeruzelem vaast en zeker wel deur kregen hebben,
wat veur stravven Ik al over heur brocht heb.'
Mor niks ter van: zai goan aal mor deur
mit heur gemaine streken." ¹⁷

⁸ Doarom zegt de Heer:
"Wacht mor, dat Ik as richter bie joe kom!
Den zel mien vonnes wezen,
dat Ik volken en keunenkrieken op n bult veeg
en mien glìnne grammiedeghaid op heur deelkommen loat.
Wees der mor wis van:
den zel haile wereld verteerd worden
deur t vuur van mien vroak
omdat Ik nait velen kin dat ze Mie verachten." ¹⁸