Sefanja 2

Moäb en Ammon

⁸ d'Aalmachtege Heer, God van Izrel, zegt:
"Ik heb t schimpen van Moäb
en t ragen en schelden van Ammonnieten
tegen mien volk wel heurd,
dou zai n grode mond tegen heur opzetten
en snaarden dat ze wel boas worden zollen over heur laand.
⁹ Doarom, zo woar as Ik leef,
Moäb en Ammon zellen net zo worden as Sodom en Gomorra:
n onlaand mit aans niks as roet
en brannekkels
en zoltputten,
n streek doar nooit wat wazzen wil.
Dij der nog over binnen van mien volk
zellen Moäb en Ammon heur laand leegreupen
en t in bezit nemen."
¹⁰ Zo kriegen ze heur hoogmoud en heur grootbekkerij,
heur snakken en snaren
tegen t volk van d'Aalmachtege Heer betoald.
¹¹ De Heer zel heur schrik op hoed joagen.
Hai zel ale goden van eerde verswinnen loaten.
Volken van ale landen bie zee
zellen veur Hom op knijen valen,
elk in zien aigen laand. ¹¹