Sefanja 1

God zel Judoa, Jeruzelem en haile wereld stravven

² De Heer zegt:
"Ik veeg aal wat ter op eerde is
in ainmoal vot:
³ mensken en daaier,
vogels in lucht
en vizzen in zee,
ook ale ofgoden dij mensken tou goddelooshaid verlaaiden
tougelieks mit aal dij goddelozen. ²
Der blift gain leventeg mensk meer in wereld over. ³

⁴ Benoam Judoa
en aal t volk van Jeruzelem pak Ik aan.
Doar zel Ik lu dij Baäl vereren,
en Baäl zien dainders en priesters
altemoal veurgoud oetreuden,
⁵ ook aal dij lu dij op t platdak van heur hoes
op knijen liggen veur steerns,
en keunenk van steerns vereren, ⁴
⁶ mor dij Mie, de Heer, ontraauw binnen
en gain spier om Mie geven,
en dij Mie nait vereren."
⁷ Holdt joe stil! God de Heer komt ter aan!
Dag dat Hai komt mit zien straf is al stoefbie.
Hai zel n grode slachten aanrichten in Judoa.
Zien legers het E al kloar stoan.

⁸ "Den zel Ik," zegt de Heer,
"ale hoge amtenoaren
en keunenk zien haile hofholden
zunder genoade ofstravven,
aal dat volk mit heur nijmoudse boetenlaandse klaaieroazie,
⁹ en mit heur haaidense meroakels; ⁵
dij t pelaais volproppen mit spul
dat ze aandern ofstolen hebben mit geweld en bedrog." ⁶
¹⁰ "Dij dag," zegt de Heer,
"klinkt ter in Vispoort gejammer,
en gereer in Nijstad,
en in Heuvelkluft n aibels gekroak van hoezen dij in nkander zakken.
11Den is ter gekaarm en gejammer
van lu in Viezelbuurt,
omdat ale kooplu mit geweld aan heur èn kommen
en ale mensken dij in t geld swemmen doodmoakt worden. ⁷

¹² Den zel Ik hail Jeruzelem
in ale houken en hörns
mit n fèlle laamp deurzuiken
om dij hoge heren te pakken te kriegen,
dij doen worden binnen van olde wien,
dij mainen: de Heer dut ons ja toch niks,
gain goud en gain kwoad.
¹³ Heur riekdom roaken zai kwiet,
heur hoezen worden vernaild.
Of hebben ze ook hoezen baauwd
- der in wonen zellen ze nait;
of hebben ze wiendroefbozzen poot
- ze zellen der gain wien van drinken."

¹⁴ Dij vrezelke dag van de Heer is al stoefbie;
mit koegelsgeweld komt e der aan.
Ik heur t aarmhaarteg gejammer op dij dag al.
Alderdeegs de dappersten brullen t oet van benaauwdhaid.
¹⁵ t Is ja dag van God zien grammiedeghaid,
van alteroatsie en benaauwdeghaid,
van vernailen en verinnewaaiern,
van donker en duuster,
van dikke wolken en dunderkoppen,
¹⁶ n dag dat noodklok ludt
en t oorlogsgeroup klinkt
tegen börgen en torens.

¹⁷ "Den zel Ik mensken zo dik in t ellèn brengen
dat ze rondwoaren as blinden.
Ze hemmen ja tegen Mie misdoan,"
zegt de Heer.
"Heur bloud wordt oetgoten as wotter
en heur liggoamen liggen te verrötten as drek.
¹⁸ As de Heer komt mit zien glìnne kwoadhaid
helpen heur zulver en gold mensken ook niks meer.
Haile wereld zel vergoan
deur de glìnne gloud van zien vergrèldhaid.
Hai zel ale mensken
in ainmoal rompslomps in t ongeluk joagen."