Ruth 4

Boäz traauwt mit Ruth

¹ Ondertussen was Boäz noar poort tou goan en haar zok doar deelzet. Dou kwam lözzer hom veurbie, doar Boäz t over had haar. Dou zee hai: "Ie doar, kom ais hier en goa zitten." Hai kwam doar en ging zitten. ² Van oldsten van stad nam hai tien man en hai zee: "Goat hier zitten", en zai gingen zitten. ³ Dou zee hai tegen lözzer: "Noömi, dij oet t laand van Moäb weerom is, zel t stok laand verkopen dat van ons bruier Elimelek west het. ⁴ Nou haar ik docht -en ik zeg joe t nou- koop ie t, doar dij hier zitten en oldsten van mien volk bie binnen. Voldou joen plicht as lözzer, as ie dat willen; mor zeg mie as ie joen plicht as lözzer nait voldoun, dat ik t wait. Want der is gainain om te lözzen boeten joe, en den kom ik." Dou zee hai: "Ik zel lözzen." ⁵ Mor Boäz zee: "Op dag dat ie t laand aanveerden oet handen van Noömi, krieg ie ook Ruth, dij Moäbitische, doar de man van sturven is, om dij zien noam in stand te holden op zien aarfdail." ⁶ Dou zee dij lözzer: "Hier zel ik nait veur börgen kinnen, mien aarfdail zol meschain te gronde goan; wees ie de lözzer veur wat ik lözzen mos; want börgen kin ik t nait." ⁷ In Izrel was in olde tieden mit lözzen en ruilen gebruuk dat, om de haile zoak vaast te leggen, ain zien schoug oetdee en aan aander gaf -In Izrel haar dat zo zien beslag-. ⁸ Lözzer zee tegen Boäz: "Koop ie joe t mor." En hai dee zien schoug oet. ⁹ En dou zee Boäz tegen oldsten en tegen aal t volk: "Vandoag bin ie getugen, dat ik aal wat van Elimelek west het en van Kiljon en Machlon, koop oet handen van Noömi. ¹⁰ En Ruth, de Moäbitische vraauw van Machlon, neem ik mie as vraauw om noam van heur versturven man in stand te holden op zien aarfdail. Zo zel zien noam mank sibben, volk en oldsten nait verloren goan." ¹¹ En aal t volk in poort en oldsten mit, zeden dou: "Wie binnen getugen. Dat de Heer dizze vraauw dij in joen hoes komt, moaken mag geliek as Rachel en as Lea, dij baaident t hoes Izrel baauwd hebben; en gedroag joe klouk in Efrata en wor vernuimd in Betlehem. ¹² En dat joen hoes wezen mag as t hoes van Peres (dij Tamar Judoa schonken het) deur t noageslacht dat de Heer joe oet dizze jonge vraauw geven zel." ¹³ En zo nam Boäz Ruth en zai wer zien vraauw, en hai haar gemainschop mit heur. De Heer muik dat zai in verwachten ruik en n zeun kreeg. ¹⁴ Dou zeden vraauwlu tegen Noömi: "Loat ons de Heer priezen dij niks verzuumd het om joe heden n lözzer te geven; dat van zien noam in Izrel hoog opgeven worden mag. ¹⁵ Joen ziel zel hai weer leventeg moaken en (hai zel) joe onderholden op joen olde dag; want joen schoondochter dij wies mit joe is het hom ter wereld brocht; zai is joe meer weerd as zeuven zeuns." ¹⁶ Noömi nam t kind op en zette t op heur schoot en verzörgde t. ¹⁷ Buurvraauwen gavven hom n noam en zai zeden: "Der is n zeun veur Noömi geboren." En zai nuimden hom Obed. Hai is de voader van Isaï, voader van Doavid.