Ruth 3

Ruth bie Boäz op dörsdeel

¹ En Noömi, heur schoonmoeke, zee tegen heur: "Mien wicht, zol ik gain vasteghaid veur joe zuiken, dat joe t goud goan zel? ² Boäz, bie dij zien vraauwlu ie west hebben, is ja nog femilie van ons. Dij is vanoavend op dörsdeel aan t gaarst wannen; ³ was en zaalf joe, dou joen overklaid aan en goa noar dörsstee tou; mor zo, dat hai joe nait vernemt veur en aleer hai etendrinken doan het. ⁴ As hai zok deellegt mout ie goud acht geven op t stee doar hai ligt; goa doar noar tou, sloag t dek bie zien voutenèn op en leg joe doar deel. Den dut hai wel blieken wat ie doun mouten." ⁵ Dou zee zai tegen heur: "Aal wat ie zeggen zel ik doun." ⁶ Zai ging dou noar dörsstee tou en ze dee alles zo as heur schoonmoeke heur t besteld haar. ⁷ Noa etendrinken was t Boäz goud te moude en hai ging hèn en legde zok deel aan t ènd van n zoadbult; dou kwam zai hail stil bie hom, sluig bie zien vouten dek op en legde zok deel. ⁸ t Was middernaacht dou man kèl wakker wer, om zok tou vuilde en vernam dat ter n vraauw bie hom aan t voutenèn lag. ⁹ Hai vruig: "Wel bin ie?" Zai antwoordde: "Ik bin Ruth, joen dainstmaaid. Spraaidt joen vleugel oet over joen dainstmaaid want ie binnen lözzer." ¹⁰ Dou zee hai: "Dat de Heer joe zegen mag, mien wicht: ie hebben joen traauw nog beder bewezen as destieds, mit nait achter jongkerels aan te lopen, netgeliek of zai riek of aarm wazzen. ¹¹ Wees mor nait baang, mien wicht; aal wat ie zegd hebben zel ik veur joe doun, want t is aalgemain bekend in dizze stad dat ie n degelke vraauw binnen. ¹² Mor aal en houwel ik joen lözzer bin, is der nog n lözzer en dij is joe sibber as ik. ¹³ Blief hier vannaacht en as hai mörgenvroug joe lözzen wil, goud, loat hom joe den lözzen. As hom doar niks aan gelegen ligt, dou ik t, zo woar as de Heer leeft. Blief aan mörgentied tou liggen." ¹⁴ Zo bleef zai aan zien voutenèn liggen, aan mörgentied tou en ston op, veur en aleer men ain onderschaaiden kon, want hai zee: "t Mout nait bekend worden dat n vraauw op dörsstee kommen is." ¹⁵ Hai zee der bie: "Kom hier mit joen omslagdouk dij ie droagen en hol dij op." En zai huil hom op en hai meette doar zes moat gaarst in òf en legde heur dij op. ¹⁶ Dou zai bie heur schoonmoeke kommen was zee dij: "Hou is joe t vergoan, mien wicht?" En zai vertelde heur t aalmoal wat de man heur doan haar, en zai zee: ¹⁷ "Dizze zes moat gaarst het hai mie geven, want hai zee tegen mie: 'Kom nait mit lege handen aan bie joen schoonmoeke.'" ¹⁸ Zai zee dou: "Hol joe trankiel, mien wicht, tot ie waiten hou of t oetpakt: want dij man zel nait rusten veur hai dizze zoak vandoag nog tot n goud ènd brocht het."