Rechters 8

Neerloag van Midjanieten

⁴ Gideon was mit zien volk Jordoan overstoken. Schoon dat ze achter poest wazzen, bleven ze Midjanieten toch achternoa zitten. ⁵ Doarom zee Gideon tegen lu van Sukkot: "Ik zit heer achter Zebach en Salmunna, laaiders van Midjan. Geef mien soldoaten wat te eten! Ze kinnen ja hoast nait wieder!" ⁶ Mor laaiders van Sukkot zeden: "Woarom zol we joen leger te eten geven? Heb ie Zebach en Salmunna meschain al in handen?" ⁷ "Nee, dat nait!", zee Gideon, "Mor ie mouten hier mor op reken: zo gaauw as de HEER mie Zebach en Salmunna in handen geven het, zel ik joe ofraanzeln mit doorns en stiekels oet woestijn!" ⁸ Van Sukkot ging hai wieder, noar Penuël tou. Aan t volk van Penuël vruig e t zulmde as e aan lu van Sukkot vroagd haar. Mor hai kreeg van heur t zulmde antwoord. Dat hai gaf t volk van Penuël te verstoan: "Zo gaauw as k zond en wel weerom kom, zel k joen toren hier mit grond liek moaken!"
¹⁰ In tussentied haren Zebach en Salmunna heur legerkaamp opzet in Karkor. Ze wazzen mit om en bie vieftiendoezend man. Meer was ter nait overbleven van t haile leger van t volk oet t oosten. Honderdtwinnegdoezend verege kerels wazzen sneuveld. ¹¹ Gideon volgde t pad van nomoaden, ten oosten van Nobach en Iogbeha, en hai kreeg t kloar t legerkaamp van Midjanieten te overrompeln. Dij wazzen naargens op verdocht! ¹² Baaide laaiders van stam, Zebach en Salmunna, perbaaierden in ale konsternoatsie der tussenoet te kniepen, mor hai ging achter heur heer en kreeg ze bie de kladden.
¹³ Weerom oet stried, kwam Gideon, Joäs zien zeun, bie pas van Cheres laans. ¹⁴ Onderwegens kreeg e n jong oet Sukkot in handen. Hai heurde hom oet en luit hom ale noamen vertellen van oldsten en van t stadsbestuur van Sukkot. Zeuvenseuventeg wazzen t. ²⁰ ¹⁵ Dou ging e noar Sukkot tou. "Kiek ais wèl ik hier heb!", zee e, "Zebach en Salmunna, doar ie mie mit veur gek holden hebben! Ie zeden ja: Woarom zol we joen leger te eten geven? Heb ie Zebach en Salmunna meschain al in handen?" ¹⁶ Hai pakte oldsten op en luit doorns en stiekels tou woestijn oet hoalen. En dat het t volk van Sukkot waiten! ¹⁷ In Penuël smeet e toren ondersteboven. Börgers van stad muik e dood.
¹⁸ Aan Zebach en Salmunna vruig Gideon: "Wat wazzen dat veur lu, dij ie bie baarg Tabor doodmoakt hebben?" "Ze zaggen der krekt zo oet as ie", antwoordden ze. "t Leken wel keunenkskinder - stok veur stok!" ¹⁹ Dou zee Gideon: "Dat wazzen mien volle bruiers, mien moeke heur aigen zeuns! Bie de HEER, as ie heur in t levent loaten haren, zol ik joe nou nait doodmoaken!" ²⁰ Hai bestelde zien oldste zeun Jeter: "Tou! Moak heur dood!" Mor t jong trok zien sweerd nait. Hai duurde nait: t was ook ja nog mor n kwoajong. ²¹ Zebach en Salmunna zeden: "Dou t zulm den! Ie binnen toch maans genog!" Dou muik Gideon heur zulm dood. Golden moanjes, dij heur kemélen om haals haren, nam e mit.